Նախկին հրամանատարը ձերբակալված է

Իջեւանի N զորամասի հրամանատար Սերգեյ Կարապետյանը ձերբակալված է: Առաջիկայում նրա դեմ նաեւ մեղադրանք կառաջադրվի:

Այս մասին քիչ առաջ տեղեկացանք պաշտպանության նախարարի մամուլի քարտուղար Դավիթ Կարապետյանից:

Հիշեցնենք, որ 2010-ի դեկտեմբերի 31-ի երեկոյան Գետահովիտ գյուղից մի քանի երիտասարդ «Նիվա» մակնիշի ավտոմեքենայով գնալիս են եղել բանակում ծառայող իրենց ընկերոջը տեսնելու:

Անցագրային կետի մոտ նրանց տեսել է Ս. Կարապետյանը, սկսել է հայհոյել եւ հրամայել` լքել զորմասի տարածքը: Տղաներից մեկը պատասխանել է հայհոյանքին: Դրանից հետո հրամանատարը հանձնարարել է բռնել տղաներին եւ տանել զորամասի վարչական շենքի աշխատասենյակ, որտեղ էլ նրանց դաժանորեն ծեծել են:

Տեղի ունեցած միջադեպի հետեւանքով գանգուղեղային վնասվածք ստացած Տարոն Ենգիբարյանը երեկ ժամը 24-ի սահմաններում մահացել է: 21-ամյա տղան մոտ մեկ շաբաթ անգիտակից վիճակում գտնվելիս է եղել Երեւանի «Գրիգոր Լուսավորիչ» բժշկական կենտրոնի վերակենդանացման բաժանմունքում:

Փաստի առիթով քրեական գործ է հարուցվել խուլիգանության հատկանիշներով` Քրեական օրենսգրքի 258 հոդվածի երրորդ մասով: