Քլինթոնն արդեն կատակով է խոսում WikiLeaks-ի մասին

Շբաթ երեկոյան, Հիլարի Քլինթոնը ընդունելություն է կազմակերպել Պետդեպարտամենտում: Նա հյուրընկալել էր «Քենեդի» կենտրոնի այս տարվա մրցանակակիրներին:

Նրանց հետ զրույցում Քլինթոնը կատակով է խոսել WikiLeaks-ի մասին, ասել, որ իր սեփական հաղորդագրությունն է արձակելու: «Ես այս իրադարձության մասին փաստաթուղթ եմ գրում, որը վստահ եմ՝ շուտով ձեզ ամենամոտ վեբ-կայքում կգտնեք»,- ասել է Քլինթոնը:

Քենեդու կենտրոնի այս տարվա մրցանակակիրներն էին Օփրա Ուինֆրին, Փոլ Մաքքարթնին, բալետմեյստեր Բիլ Թ. Ջոնսը, քանթրի երգիչ Մերլ Հագարդը և Բրոդվեյի երգահան Ջերի Հերմանը:

Քլինթոնը Մաքքարթնիի հետ զրուցելիս ասել է, որ Բիթլզի Hey Jude երգը իր iPod-ում ամենասիրելի երգն է:

Միջոցառումն ավարտվել է կիրակի օրը տեղի ունեցած համերգով: