Դավիթ Համբարձումյանի գործի քննությունն ավարտվել է

Վերաքննիչ դատարանում  ավարտվել է Մասիսի նախկին համայնքապետ Դավիթ Համբարձումյանի վերաբերյալ գործի քննությունը, դատարանը հունիսի 25-ին կհրապարակի որոշումը։  

Դավիթ Համբարձումյանի փաստաբան Գայանե Պապոյանը նիստի ավարտից հետո լրագրողներին ասել է.

«Դատարանում այսօր արձանագրվեց, որ որպես այդպիսին՝  դատավարական որևէ գործողություն կատարելու անհրաժեշտություն չկա, պարզապես տվյալ օրը՝ հունիսի 25-ին, դատական նիստը կբացվի և դատարանը կհեռանա խորհրդակցական սենյակ, որից հետո կհրապարակվի որոշումը։

Դատական նիստի ընթացքում ուսումնասիրվել է տեսագրությունը, որից ակնհայտ է՝ Դավթի Համարձումյանը ծեծկռտուքի մասնակից չէ։

Դավիթ Համբարձումյանն անմեղ է, ուստի արդարացման դատական ակտ պետք է կայացվի»,-նշել է փաստաբանը։

Հիշեցնենք՝ Դավիթ Համբարձումյանին մեղադրանք էր առաջադրվել 2018 թվականի ապրիլի 22-ին Հայանիստ-Հովտաշատ գյուղերի խաչմերուկում «ակցիայի մասնակիցների վրա հարձակվելու» և ապրիլի 22-ին Էրեբունի վարչական շրջանում տեղի ունեցած զանգվածային անկարգությունների փաստով։ Համբարձումյանը կալանավորվել էր, հետո 5 միլիոն դրամ գրավի դիմաց ազատ արձակվել:

ՔԿ-ն 2019 թվականին հանցակազմի բացակայության պատճառով դադարեցրել էր Դավիթ Համբարձումյանի նկատմամբ քրեական հետապնդումը զանգվածային անկարգությունների մասով։ 

2025 թվականի հոկտեմբերի 23-ին, սակայն, Դավիթ Համբարձումյանին դատապարտել էին 6 տարի, 3 ամիս ժամկետով ազատազրկման՝ 7 տարի առաջվա այս գործով, որով դատարանում քննված ոչ մի վկա մեղադրական ցուցմունք չէր տվել Համբարձումյանի դեմ։

Համբարձումյանին կալանավորել էին ինքնաթիռի դռան մոտից։

Հունվարին դատարանը Համբարձումյանի խափանման միջոց էր սահմանել տնային կալանքը։