Ադրբեջանի ՊՆ–ն 3–րդ ապատեղեկատվությունն է տարածում. ՀՀ ՊՆ–ն հերքում է

Ադրբեջանի պաշտպանության նախարարությունը շարունակում է ապատեղեկատվություն տարածել, հայտնում է ՀՀ ՊՆ–ն։ Քիչ առաջ ՀՀ պաշտպանական գերատեսչությունը օրվա մեջ 3–րդ անգամ հերքեց Ադրբեջանի ՊՆ տարածած լուրը։

«Ադրբեջանի ՊՆ հաղորդագրությունը, թե իբր մարտի 16-ին՝ ժամը 20։10-20։45-ն ընկած ժամանակահատվածում, ՀՀ ԶՈւ ստորաբաժանումները կրակ են բացել սահմանագոտու հարավարևելյան հատվածում տեղակայված ադրբեջանական դիրքերի ուղղությամբ, չի համապատասխանում իրականությանը»,–տեղեկացնում է ՀՀ ՊՆ–ն։

Նշենք, որ Ադրբեջանը այսօրվա ընթացքում արդեն 2 անգամ նմանօրինակ հաղորդագրություններ տարածել է` հայկական կողմին մեղադրելով իրենց դիրքերի ուղղությամբ կրակելու համար։ ՀՀ ՊՆ ամեն անգամ հերքել է տեղեկությունը։