Պրիմակովը հաստատել է՝ Բաքվից «Ռուսական տան» գրանցման պահանջով նոտա են ստացել

«Ռոսսոտրուդնիչեստվոյի» ղեկավար Եվգենի Պրիմակովը հաստատել է, որ Ադրբեջանից նորա են ստացել այն մասին, որ անհրաժեշտ է գրանցել Բաքվում ռուսական մշակութային կենտրոնը (Ռուսական տունը)։ Այս մասին նա հայտարարել է «Ռոսիա-24» հեռուստաալիքի եթերում։

«Առայժմ մենք կարող ենք միայն հաստատել, որ Ադրբեջանի արտաքին գործերի նախարարությունից նոտա է ուղարկվել մեր ԱԳՆ, որտեղ ասվում է, որ մեր ներկայացուցչությունը՝ Ռուսական տեղեկատվական և մշակութային կենտրոնը, որը հայտնի է նաև որպես Ռուսական տուն, պետք է գրանցվի որպես իրավաբանական անձ տեղական օրենսդրությամբ», - ասել է Պրիմակովը։ Նա պարզաբանել է, որ «դա սկզբունքորեն նախատեսված է միջկառավարական համաձայնագրով, որը ստորագրվել է դեռևս 1997 թվականին»։

Պրիմակովի խոսքով՝ Մոսկվան միշտ պատրաստ է եղել Բաքվում գրանցել ռուսական տեղեկատվական-մշակութային կենտրոնը, սակայն նրանց խնդրանքները մնացել են անպատասխան։