Հայաստանը չի կողմնորոշվել «չոր նավահանգստի» ժամկետների հարցում. ում հետ է բանակցում Երևանը

Հայաստանը դեռևս չի կողմնորոշվել Գյումրիում «չոր նավահանգստի» և արդյունաբերական հանգույցի կառուցման նախագծի իրականացման ժամկետների հարցում։ Երևանը միջազգային ընկերությունների շրջանում շարունակում է օպերատորի որոնումները։ Այս մասին Sputnik Արմենիայի գրավոր հարցմանն ի պատասխան տեղեկացրել է ՀՀ էկոնոմիկայի նախարարությունը։

2023 թվականի դեկտեմբերին հայտնի դարձավ, որ «չոր նավահանգստի» տեխնիկատնտեսական հիմնավորումն (ՏՏՀ) արդեն պատրաստվել է միջազգային հոլանդական MTBS խորհրդատվական ընկերության կողմից։ 2024 թվականի երկրորդ կեսին պետք է սկսվեին շինարարական աշխատանքները։

Գերատեսչությունում պարզաբանել են, որ նախագծի իրականացման համար Երևանն ակտիվ բանակցություններ է վարում մի շարք միջազգային ընկերությունների և կազմակերպությունների հետ՝ ներդրումներ ներգրավելու և օպերատոր ընտրելու նպատակով: Պոտենցիալ գործընկերների թվում են Ասիական զարգացման բանկը, ինչպես նաև Մերձավոր Արևելքի երկրներում (ԱՄԷ, Իրաք և Կատար) նմանատիպ նախագծերի իրականացմամբ զբաղվող կառույցները:

«Բացի ՏՏՀ-ից, մշակվել է նախագծի իրականացման ճանապարհային քարտեզ, շարունակվում են նաև բանակցությունները», - ասված է գերատեսչության պատասխանում:

Նախարարությունը նշում է, որ նախագծում հնարավոր փոփոխությունները կարող են կապված լինել դրա իրականացման ժամկետների հետ: Այս բոլոր հարցերը քննարկման փուլում են։ Ծրագրի իրականացումը կնպաստի տնտեսության աճին, նոր աշխատատեղերի ստեղծմանը, ինչպես նաև արտահանման ծավալների ընդլայնմանը:

Հիշեցնենք, որ նախագծով նախատեսվում է Գյումրիում լոգիստիկ կենտրոնի, արդյունաբերական գոտու և պահեստների հետ ազատ առևտրի գոտու ստեղծում: Դա թույլ կտա ապրանքներ և բեռներ տեղափոխել ցանկացած ուղղությամբ՝ օգտագործելով ինչպես օդային, այնպես էլ երկաթուղային տրանսպորտը:

«Չոր նավահանգստի» հասկացությունը հատկապես արդիական է դեպի ծով ելք չունեցող երկրների համար, ինչպիսին Հայաստանն է։ «Չոր նավահանգիստը» ֆունկցիոնալ առումով ոչնչով չի տարբերվում ծովայինից, բացառությամբ այն բանի, որ նավերի փոխարեն օգտագործվում են վագոններ, երկաթուղիներ և բեռնատարներ։ Ազատ տնտեսական գործունեության գոտում նախագիծը կդառնա առևտրի զարգացման համար օպտիմալ լուծում։

Գյումրին ընտրվել է իր զարգացած ենթակառուցվածքների և ավտոմոբիլային, օդային և երկաթուղային կապն ապահովելու հնարավորությունների շնորհիվ: Քաղաքը սահմանակից է Թուրքիային ու Վրաստանին և կարող է կապ ապահովել Ռուսաստանի և Եվրոպայի երկրների հետ Սև ծովի նավահանգիստների միջոցով։