Yandex, GG և մյուս էլեկտրոնային հարթակներին միացած 20 հազար վարորդ արդեն գրանցվել է հարկային մարմնում

GG, Yandex, Utaxi և այլ էլեկտրոնային հարթակներից ստացված պատվերներով տաքսի ծառայություն մատուցող 20 հազար վարորդ արդեն գրանցվել է հարկային մարմնում. վերջին տվյալով՝ տրամադրվել է շուրջ 150 հազար էլեկտրոնային կտրոն՝ 192 մլն դրամ արժեքով: «Արմենպրես»-ի հետ զրույցում այս մասին ասաց ՊԵԿ «Ջի Սոլյուշնս» ՊՈԱԿ նախագծերի իրականացման դեպարտամենտի ղեկավար Լուսինե Այվազյանը՝ մանրամասներ ներկայացնելով սեպտեմբերի 1–ից ուժի մեջ մտած նոր կարգավորումների վերաբերյալ:

Հիշեցնենք՝ սեպտեմբերի 1–ից տաքսի ծառայությունների ոլորտում գործում են նոր կարգավորումներ: Տաքսի ծառայության ոլորտում գործունեություն իրականացնողները տրամադրում են էլեկտրոնային ՀԴՄ կտրոններ: 

Էլեկտրոնային հարթակների միջոցով գործունեություն իրականացնող ՀՀ քաղաքացիները, Լեռնային Ղարաբաղից բռնի տեղահանված և Հայաստանում հաստատված քաղաքացիները հաշվառվում են հարկային մարմնում՝ հարթակի միջոցով պարզեցված ընթացակարգով՝ առանց որևէ դիմում ներկայացնելու: