Իրանի նախագահն ասել է, որ կստիպի Իսրայելին զղջալ Հանիեի սպանության համար

Թեհրանում պաղեստինյան արմատական ՀԱՄԱՍ շարժման քաղբյուրոյի ղեկավար Իսմայիլ Հանիեի մահից հետո Իրանի նախագահ Մասուդ Փեզեշքիանը հայտարարել է, որ երկիրը կպաշտպանի իր ինքնիշխանությունը և կստիպի «ահաբեկչական օկուպանտներին» զղջալ իրենց արարքների համար, փոխանցում է ТАСС-ը։

«Իրանի Իսլամական Հանրապետությունը կպաշտպանի իր տարածքային ամբողջականությունն ու արժանապատվությունը և կստիպի ահաբեկիչ օկուպանտներին զղջալ իրենց վախկոտ գործողությունների համար»,- ասվում է Փեզեշքիանի հայտարարության մեջ։

Իրանի նախագահն ընդգծել է, որ «Իրանի և Պաղեստինի ժողովրդի միջև կապն ավելի ամուր կլինի, քան նախկինում էր, դիմադրությանն աջակցությունն ավելի ամուր կլինի, քան նախկինում էր»։ 

«Երեկ ես բարձրացրի նրա հաղթական ձեռքը, իսկ այսօր պետք է թաղեմ նրան իմ ուսերի վրա», - հավելել է նա՝ նկատի ունենալով երեկվա երդմնակալության արարողությունը, որտեղ ՀԱՄԱՍ-ի առաջնորդն ու Իրանի նախագահը կանգնել էին ձեռքերը օդ բարձրացրած։

Հիշեցնենք՝ Թեհրանում սպանվել է ՀԱՄԱՍ շարժման քաղաքական բյուրոյի ղեկավար Իսմայիլ Հանիան։ Շարժումը հայտարարել է, որ հարձակումը տեղի է ունեցել այն բանից հետո, երբ Հանիան մասնակցել է Իրանի նորընտիր նախագահ Մասուդ Փեզեշքիանի երդմնակալության արարողությանը: