ՔՊ-ականը խմբագրել է կռիսների՝ ճոճվող նավից թռչելու մասին իր գիշերային ահազանգը

Երևանի Դավթաշեն վարչական շրջանի ղեկավար Ռոման Համբարձումյանը, որը համատեղությամբ նաև «Քաղաքացիական պայմանագիր» կուսակցության՝ նույն վարչական շրջանի տարածքային կառույցի խորհրդի նախագահն է, անցած գիշեր ահազանգել էր, որ իշխանության նավը ճոճվում է, և առնետավազք է սկսվել: Նա դա թեև արել էր իբրև թե կատակով՝ «Կռիսներ ոնց եքք Նավը ճոճումա թռեք» արտահայտությամբ, այդուհանդերձ, պարզորոշ է, որ իշխանության ներսում ինչ-որ բան է կատարվում: Այլապես, ինչպես ժողովրդական խոսքն է ասում՝ երբեք առանց կրակ ծուխ չի բարձրանում:

Այսօր առավոտյան նշված անձը նույն գրառումը մի քանի անգամ խմբագրել է՝ սկզբից դիմելով ժողովրդին, հետո դա խմբագրել է և կոչն ուղղել արդեն ընկերներին (տե՛ս լուսանկարները). «Իսկ ավելի լուրջ հանգիստ եղեք ընկերներ ջան ամեն ինչ նորմալ է վերահսկողության տակ է, ավելին՝ հրաշալի է. Բոլորդ էլ գիտեք ովքեր են եւ ինչ են ուզում չի ստացվի»:

Ռոման Համբարձումյանը առավոտյան իր գրառումը խմբագրել է և տակը այդ «հանգստացուցիչ» բացատրությունը ավելացրել հավանաբար այն բանից հետո, երբ վերևներից նկատել են վարչակազմի ղեկավարի այդ ինքնագլուխ ահազանգը և հետը տարել որոշակի «դաստիարակչական աշխատանքներ»:

Այն, որ իշխանական նավը բերնեբերան լցված է առնետներով, և վերջիններս իրար հերթ չտալով թռչելու են այդ նավից՝ դա բոլորին է պարզ, հետաքրքիր այն է, որ դա արդեն բացեիբաց խոստովանում են իշխանության տարածքային ղեկավարները:

Վահե Սարգսյան