Վա՜յ այն ազգին, որը հավատարիմ չէ իր պապերի խորհրդանիշերին․ Արամ Առաջին

Մեծի Տանն Կիլիկիո Կաթողիկոսության Սբ․ Գրիգոր Լուսավորիչ Մայր Տաճարում Ն.Ս.Օ.Տ.Տ. Արամ Ա Կաթողիկոսի նախագահությամբ Սուրբ Վարդանանց տոնի առթիվ մատուցվել է Սուրբ Պատարագ։

Վեհափառ Հայրապետն իր պատգամում անդրադարձել է ազգային խորհրդանիշերի նշանակությանը՝ ընդգծելով, որ դրանք մեր ազգի գոյատևման երաշխիքն են և հույս են ներշնչում պատմության փոթորկոտ այս շրջանում։

«Վա՜յ այն ազգին, որը չունի խորհրդանիշ։ Վա՜յ այն ազգին, որը հավատարիմ չէ իր պապերի խորհրդանիշերին»,- ասել է Արամ Առաջինը՝ զգուշացնելով, որ այսօր, դժբախտաբար, հայ ազգը՝ Հայրենիքում թե Սփյուռքում, սկսել է կամաց-կամաց հեռանալ իր պապերի արյամբ ու աղոթքով կերտված խորհրդանիշերից։

«Այսօր Հայաստանում և Սփյուռքում մեր ժառանգած խորհրդանիշերը՝ կրոնական, բարոյական, մշակութային թե ազգային բնույթի, սկսել են բովանդակային և իմաստային առումով փոխվել այլասերիչ և ապազգային մոտեցումների պայմաններում։ Ցավալի է այս երևույթն ու անընդունելի»,- հայտարարել է Մեծի Տանն Կիլիկիո Կաթողիկոսը։