ԱՄՆ-ի հանրային աջակցությունը ՀԱՄԱՍ-ի դեմ Իսրայելի պատերազմին նվազում է

Համասի դեմ Իսրայելի պատերազմին ԱՄՆ-ի հանրային աջակցությունը նվազում է, և ամերիկացիների մեծամասնությունը կարծում է, որ Իսրայելը պետք է հրադադար հայտարարի հումանիտար ճգնաժամի վերածված հակամարտությունում:

Reuters/Ipsos-ի նոր հարցման համաձայն, հարցվածների մոտ 32%-ն ասել է, որ «ԱՄՆ-ը պետք է աջակցի Իսրայելին։ Ավելի վաղ հոկտեմբերի 12-13-ն անցկացված հարցման ժամանակ 41%-ն է եղել այս տեսակետին։

Նրանց մասնաբաժինը, ովքեր կարծում են, որ «ԱՄՆ-ը պետք է չեզոք միջնորդ լինի» հասել է 39%-ի։ Հարցվածների 4 տոկոսն ասել է, որ ԱՄՆ-ը պետք է աջակցի պաղեստինցիներին, իսկ 15 ​​տոկոսը նշել է, որ ԱՄՆ-ն ընդհանրապես չպետք է ներգրավվի հակամարտության մեջ։ Երկու ցուցանիշներն էլ նման են մեկ ամիս առաջ եղածին։

ԱՄՆ-ի հանրային աջակցության անկումը, որը դիտարկվում է նոր հարցման մեջ թե՛ դեմոկրատների, թե՛ հանրապետականների և հատկապես տարեց տարիքի հարցվածների շրջանում, հաջորդել  է Գազայի հատվածում ՀԱՄԱՍ-ի դեմ շաբաթներ տևող  իսրայելական ուժեղ ռմբակոծություններին և ցամաքային մարտերին։ 

Հակամարտության սկզբից, ըստ Գազայի հատվածի առողջապահության պաշտոնյաների,  ավելի քան 11,000 պաղեստինցի է զոհվել իսրայելական հարձակումների հետևանքով, որոնց մոտ 40%-ը երեխաներ են:

Գազայի ճգնաժամը միջազգային բողոք է առաջացրել, որը վերջին օրերին կենտրոնացած է առափնյա բազմամարդ  անկլավում բժշկական ենթակառուցվածքի ոչնչացման վրա: Գազայի ամենամեծ հիվանդանոցում փակված պաղեստինցիները երեքշաբթի եղբայրական գերեզման են փորել՝ Իսրայելի շրջափակման պատճառով  մահացած հիվանդներին  թաղելու համար:

Reuters/Ipsos-ի հարցման մասնակիցների 68%-ը նշել է, որ համաձայն է այն պնդմանը, որ «Իսրայելը պետք է հրադադար հայտարարի և փորձի բանակցել»:

Հարցմանը մասնակցած դեմոկրատների մոտ երեք քառորդը և հանրապետականների կեսը պաշտպանել են հրադադարի գաղափարը՝ ի տարբերություն Ջո Բայդենի, որը մերժել էր արաբ առաջնորդների, այդ թվում՝ պաղեստինցիների կոչերը՝ ճնշում գործադրել Իսրայելի վրա հրադադարի հասնելու համար: Փոխարենը, Բայդենի վարչակազմը Իսրայելին կոչ է արել անել հնարավորը՝ խաղաղ բնակչության շրջանում զոհերից խուսափելու համար։

Իսրայելը մինչև հիմա մերժում  է երկարատև դադարների կամ հրադադարի մասին ցանկացած խոսակցություն՝ ասելով, որ ՀԱՄԱՍ-ը կօգտագործի ժամանակը վերախմբավորվելու և իր դիրքերն ուժեղացնելու համար:

Իսրայելի համար պոտենցիալ անհանգստացնող նշան է, որ հարցվածների միայն 31%-ն է ասել, որ կողմ է Իսրայել զենք ուղարկելուն, մինչդեռ 43%-ը դեմ է այդ գաղափարին: Իսրայելին զենք ուղարկելու աջակցությունն ամենամեծն էր հանրապետականների շրջանում, մինչդեռ դեմոկրատների մոտ կեսը դեմ էր դրան:

Համեմատության համար նշենք, որ 41%-ն ասել է, որ կողմ է Ուկրաինա զենք ուղարկելուն, մինչդեռ 32%-ը դեմ է դրան, մնացած մասը վստահ չէ: Ուկրաինային զենք ուղարկելու աջակցությունն ավելի մեծ էր դեմոկրատների շրջանում։

Reuters/Ipsos-ի հարցումն անցկացվել է առցանց ողջ երկրում, դրան մասնակցել է 1006 չափահաս: