Բաբայան-Բաքու բանակցությունները հույժ գաղտնի են. ՔԿ-ի պարզաբանումը

Արցախի նախկին ԱԽ քարտուղար Սամվել Բաբայանը Արցախից անհասկանալի հեշտությամբ ՀՀ տեղափոխվելուց հետո շտապեց Հանրային հեռուստաընկերության եթերում մի շարք աղմկահարույց հայտարարություններ անել։ Նա հայտարարել էր, որ միջնորդված բանակցություններ է վարել Ադրբեջանի ղեկավարության հետ Արցախի հետագա կարգավիճակի վերաբերյալ և 23 կետից բաղկացած առաջարկներ փոխանցել։ Այնուհետև մեկ այլ հարցազրույցի ընթացքում հայտարարել էր, որ այդ առաջարկների փաթեթը ներկայացրել է ՀՀ Քննչական կոմիտե։

Yerkir.am-ը գրավոր հարցմամբ դիմել էր ՀՀ ՔԿ՝ փորձելով հասկանալ, թե  Բաբայանը, լինելով պաշտոնաթող գործիչ, ի՞նչ լիազորություններ է ունեցել բանակցելու ադրբեջանական կողմի հետ, և արդյո՞ք այդ մասին տեղյակ է եղել ՀՀ իշխանությունը։

Քննչական կոմիտեն նշված տեղեկատվության տրամադրումը անհնար է  համարել՝ նշելով, որ տվյալները ենթակա չեն հրապարակման։

Ստացվում է՝ Քննչական կոմիտեն չի ժխտում, որ եղել են գաղտնի,  սեպարատ բանակցություններ Սամվել Բաբայանի և Բաքվի միջև։  

ՔԿ-ից անուղղակի հաստատում են նաև, որ Սամվել Բաբայանը ժողովրդի թիկունքում գաղտնի բնույթի այնպիսի բանակցություններ է վարել, և դրանք անդպիսի հանցավոր տարրեր են պարունակում, որոնք հրապարակման ենթակա չեն։

Արցախի ղեկավարությունը, երբ գնաց Եվլախ բանակցություններ վարելու Ադրբեջանի պատվիրակության հետ, բանակցությունների արդյունքում կայացված որոշումները որքան էլ ականջահաճո չէին, հրապարակվեցին և հայտնի դարձան հասարակությանը։ Այդ ի՞նչ գաղտնի ու վտանգավոր են եղել Բաբայանի առաջարկները, որ ՔԿ-ն հրապարակման համար ոչ ենթակա է համարում։

Քննչական կոմիտեն նաև անպատասխան է թողել հարցը՝ արդյո՞ք Հայաստանի իշխանությունները տեղյակ են եղել Բաբայանի բանակցությունների մասին, կամ լիազորել նրան։

Հաշվի առնելով Բաբայանի սերտ կապը Փաշինյանի և նրա ընտանիքի անդամների հետ՝ կարելի է ենթադրել, որ այս ամենի մասին տեղյակ է եղել ՀՀ իշխանությունը, քանի որ Սամվել Բաբայանը 44-օրյա պատերազմի ողջ ընթացքում Աննա Հակոբյանի, իմա՝ իշխանության և Նիկոլ Փաշինյանի հետ միասին եղել է պատերազմի համակարգողներից մեկը։ Հետո պատեհ անպատեհ առիթով հայտարարություններ արել՝ փորձելով մաքրագործել Փաշինյանի դավաճանական քայլերը։

Սամվել Բաբայանի քայլերը, ըստ էության, պետական դավաճանության տարրեր են պարունակում, բայց թե իրավապահ համակարգն ինչու է մինչ այս պահը լուռ՝ հասկանալի է. Փաշինյանի մտերիմ Սամվել Բաբայանը թշնամու հետ դավաճանական բանակցություններ վարելու համար այս իշխանությունների օրոք դժվար թե պատասխանատվության ենթարկվի։

Ամենևին չի բացառվում, և Փաշինյանի իշխանության օրոք շատ հնարավոր է, որ Սամվել Բաբայանի փոխարեն Հայաստանի բանտերում հայտնվի  Արցախի քաղաքական ղեկավարությունը, ովքեր ոչ միայն ժողովրդի թիկունքում չեն գործել, այլև, ի տարբերություն Սամվել Բաբայանի, չեն ճողոպրել և մինչև վերջ մնացել են արցախահայության կողքին։

Անի Նահապետյան