Նվաստացման ու անզորության օրակարգը փոխարինեք պայքարի և արժանապատվության օրակարգով․ Սուրեն Պետրոսյանի կոչը երևանցիներին

Հանրային հեռուստաընկերության եթերում կայացած բանավեճի ավարտին քաղաքական ուժերի առաջին դեմքերը փոքրիկ կոչով հանդես եկան։  

«Ժողովրդավարական համախմբում» կուսակցության ղեկավար և քաղաքապետի թեկնածու Սուրեն Պետրոսյանը ևս մեկ անգամ կոչ արեց երևանցիներին պայքարել ու կողմ քվեարկել պայքարի օրակարգին։ 

«Այս ընտրությունը արտահայտելու է մեր բոլորի առաջնահերթությունները։ Իրականում մեր առաջնահերթությունները կանաչն ու տրանսպո՞րտն է, թե՞ ավելի գլոբալ խնդիրները, որոնց առաջնային պատասխանատուն ու կրողը պետք է լինի երևանցին։ Երևանցին այդ քվեով իր ուղերձն է տալու ո՛չ միայն Հայաստանին, այլ ողջ հայությանը, որտեղ արտահայտված են լինելու իր առաջնահերթությունները։ Հետևաբար խնդրում եմ ձեր քվերակությամբ ցույց տվեք և մի՛ համակերպվեք ստեղծված օրակարգին, նվաստացման ու անզորության օրակարգը փոխարինեք պայքարի և արժանապատվության օրակարգով», - ասաց նա։ 

Հիշեցնենք, որ Ժողովրդավարական համախմբում կուսակցությունը միակ քաղաքական ուժն է, որ ավագանու ընտրություններին մասնակցում է բացառապես քաղաքական օրակարգով, այն անվանելով ինքնության հեղափոխություն։