Գեղամյանի պահվածքն անզորության արտացոլում է. Էդմոն Մարուքյան

Խորհրդարանում լրագրողների հետ զրույցում ԱԺ «Ելք» խմբակցության պատգամավոր Էդմոն Մարուքյանը հայտարարեց, որ «Ելք» խմբակցությունը խստորեն դատապարտում է Հանրապետական խմբակցության պատգամավոր Արտաշես Գեղամյանի՝ բռունցքներով «Ելք» խմբակցության ղեկավար Նիկոլ Փաշինյանի վրա հարձակվելը:

«Ամեն ինչ անելու ենք, որ Արտաշես Գեղամյանը պատժվի ԱԺ կանոնակարգ-օրենքին համապատասխան: Գեղամյանի պահվածքն անզորության արտացոլում է: Բա ասում են` էս խորհրդարանն ուրիշ է, ցիվիլ մարդիկ են: Որ ցիվիլ մարդիկ են իրենց տենց են պահում, բա ոչ ցիվիլներից ի՞նչ ակնկալենք»,- ասաց Մարուքյանը, ապա հավելեց. «Պետք է լուրջ մտածել, թե այդ ինչ մեծամասնություն է, այդ մեծամասնությունը խրախոսո՞ւմ է բռնությունը, այդ մեծամասնությունը բռնություններո՞վ է հարց լուծում: Ո՞ւմ էին ցանկանում ցույց տալ, թե գիտեք՝ մեր փաստարկները լավը չեն, բայց մենք բռունցքով հարցը կլուծենք: ՌԴ-ի՞ն էին փորձում ցույց տալ, թե՞ իրենց շեֆերին»:

Դիտարկմանը` Գեղամյանը հերքում է, որ հարվածել է Փաշինյանին, Մարուքյանը պատասխանեց, որ հակված է հավատալ իր գործընկերոջը՝ Նիկոլ Փաշինյանին:

Հարցին՝ Արտաշես Գեղամյանը վախեցե՞լ է ու հրաժարվել արարքից, թե՞ ֆրակցիայից արդեն նկատողություն է ստացել, Մարուքյանը պատասխանեց. «Չեմ կարող ասել, որովհետև, եթե ՀՀԿ ֆրակցիան չի դատապարտում, նշանակում է, որ ՀՀԿ ֆրակցիան խրախուսում է վայրենի, ոչ քաղաքակիրթ, խորհրդարանական վարք ու բարքին ոչ հարիր պահվածք»:

Պատգամավորը շեշտեց՝ իրենց խմբակցության քաղաքական մշակույթին հարիր չէ բռնությունը, սակայն չբացառեց, որ Նիկոլ Փաշինյանը կարող է իրեն պաշտպանած լինել:

Մարուքյանը նշեց, որ դեռևս ԱԺ պետք է մտնի ԵՏՄ-ից Հայաստանի դուրս գալու մասին նախագիծը: «Կարող է էդ ժամանակն էլ բոլորով հարձակվեն ու սկսեն խփել բռունցքներով, որովհետև չեն կարողանում գործընթացի ընթացքը կանգնեցնել, իսկ պրոցեսը որքան գնում է, այնքան բացահայտում է այդ միության խղճուկությունը, ՀՀԿ-ի խղճուկ լինելը, երկիրը նման վիճակի հասցնելը, և երկրի ինքնիշխանությունն օրեցօր զիջելը: Չի բացառվում, որ հետո գլուխ գովեն, ասեն, տեսեք՝ 2 հատ խփեցինք»,- հայտարարեց նա: