Եվրամիությունն ակնկալում է, որ Աղդամով Արցախ օգնության առաքումը կխթանի կանոնավոր մատակարարումների վերսկսումը

Եվրամիությունն արձանագրում է Աղդամի ճանապարհով Արցախ ռուսական մարդասիրական օգնության առաքումը և ակնկալում, որ դա կխթանի տեղի բնակչության համար մարդասիրական կանոնավոր մատակարարումների վերսկսումը:

«Եվրամիությունն ակնկալում է, որ այսօրվա զարգացումներին կհետևեն ավելի կոնկրետ քայլեր առաջիկա օրերին և շաբաթներին՝ կապված Բաքվի և Ղարաբաղի հայերի միջև նրանց իրավունքների և անվտանգության շուրջ երկխոսության, հաշտեցման ջանքերի և ընդհանուր հայ - ադրբեջանական խաղաղության գործընթացի հետ», - հայտարարել է ԵՄ խորհրդի նախագահ Շառլ Միշելի խոսնակը:

Եվրամիությունը վերահաստատում է իր խորին համոզմունքը, որ Լաչինի միջանցքը պետք է ապաշրջափակվի՝ կնքված համաձայնագրերին և Միջազգային քրեական դատարանի հրամանին համապատասխան:

«Մենք կոչ ենք անում բոլոր շահագրգիռ կողմերին ցուցաբերել պատասխանատվություն և ճկունություն՝ ապահովելու, որ ինչպես Լաչինը, այնպես էլ Աղդամ-Ասկերան երթուղին օգտագործվեն», - նշված է հայտարարության մեջ։

Ըստ հայտարարության՝ ԵՄ խորհրդի նախագահ Շառլ Միշելը շարունակում է սերտորեն ներգրավված լինել՝ առաջնային ուշադրություն դարձնելով լարվածության թուլացմանը և Ղարաբաղի հայերի առջև ծառացած հումանիտար իրավիճակին։

«Նախագահ Միշելը վերջին մի քանի օրերին ինտենսիվ շփումներ է ունեցել ինչպես Հայաստանի վարչապետ Նիկոլ Փաշինյանի, այնպես էլ Ադրբեջանի նախագահ Իլհամ Ալիևի հետ», - նշում է խոսնակը՝ հավելելով, որ այս հարցող շփումներ են եղել նաև Թուրքիայի նախագահ Ռեջեփ Թայիփ Էրդողանի հետ՝ Նյու Դելիում Մեծ քսանյակի գագաթնաժողովի շրջանակում: