Ուկրաինական ուժերը վերահսկողություն են հաստատել տասնյակ բնակավայրերի վրա

Խերսոն քաղաքից ռուսական ուժերի նահանջից հետո Ուկրաինայի զինված ուժերը դարձյալ վերահսկողություն են հաստատել մի շարք բնակավայրերի վրա: Դրանցից ամենակարևորը Նիկոլաևսկի մարզում գտնվող Սնիգիրյովկա քաղաքն է, որը գտնվում է Խերսոնի մարզի վարչական սահմանի մոտ:

Վերջին մեկ օրվա ընթացքում ուկրաինական բանակն իր վերահսկողության տակ է առել Խերսոնի և Նիկոլաևվսկի մարզերի 12 բնակավայրեր: Ուկրաինայի զինված ուժերը հաղորդում են նախկինում գրավված տարածքներում 7 կմ առաջ գնալու մասին:

Ուկրաինայի նախագահ Վլադիմիր Զելենսկին իր երեկոյան տեսաուղերձում հայտնել է երկրի հարավում 41 բնակավայրի ազատագրման մասին:

Իսկ Ռուսաստանի Պաշտպանության նախարարությունը հայտնել է, որ Կրասնի Լիմանի ուղղությամբ ռուսական զորքերը խափանել են Լուգանսկի Ժողովրդական Հանրապետության բնակավայրերը գրոհելու ուկրաինական զինուժի փորձերը:

Գերատեսչությունը նաև տեղեկացրել է, որ Նիկոլաև-Կրիվոժորսկ ուղղությամբ իրականացվում է ռուսական ստորաբաժանումների մանևր դեպի Դնեպր գետի ձախ ափին նախապատրաստված դիրքեր՝ համաձայն հաստատված պլանի:

Ի դեպ, Ուկրաինայի պաշտոնյաները կասկածանքով են մոտենում ռուսական ուժերի դուրսբերմանը Խերսոնից՝ նախազգուշացնելով, որ այդ մանևրը կարող է ծուղակ լինել:

Ինչ վերաբերում է ռազմական գործողությունների ավարտի հնարավոր ժամկետներին, Պատերազմի ուսումնասիրության ամերիկյան ինստիտուտն իր հերթական տեղեկագրում հերքել է արևմտյան մի շարք պաշտոնյաների այն կանխատեսումները, թե ձմեռային եղանակը կարող է որոշակի առումով դանդաղեցնել ռազմական գործողությունների ընթացքը և բանակցություններ սկսելու հնարավորություն ստեղծել: