Ռուսական բանակը ստացել է Ս-500 համակարգեր

Նոր սերնդի Ս-500 «Պրոմեթևս» զենիթահրթիռային համակարգերը, որոնք համատեղում են հակաօդային պաշտպանության և հակահրթիռային պաշտպանության գործառույթները, սկսում են ծառայության անցնել ռուսական բանակում. ըստ Interfax-ի՝ հայտնել է ՌԴ փոխվարչապետ Յուրի Բորիսովը։

«Այսօր արդեն սկսում են ծառայության մեջ մտնել համալիրներ, որոնք գործնականում համատեղում են հակաօդային պաշտպանության և հակահրթիռային պաշտպանության գործառույթները․ դրանք Ս-500 համակարգերն են»,- չորեքշաբթի ասել է նա։

Ս-500 «Պրոմեթևսը» նոր սերնդի հակաօդային պաշտպանության հեռահար համակարգ է, կարող է թիրախներ խոցել անգամ տիեզերքում։ Զինվորականների կարծիքով՝ Ս-500-ը կդառնա միասնական ազգային հակաօդային և հակահրթիռային պաշտպանության համակարգի հիմքը։

Օդատիեզերական ուժերի գլխավոր հրամանատար Սերգեյ Սուրովիկինն ավելի վաղ հայտարարել էր, որ С-500-ը կկարողանա ոչնչացնել արբանյակները և բոլոր մոդիֆիկացիաների հիպերձայնային զենքերը մերձակա տիեզերքում։