ՏԵՍԱՆՅՈՒԹ․ Արցախը հրապարակային բուլվար չէ, որ ամեն մեկը պապու որսորդական հրացանով պաշտանի․ Արթուր Խաչատրյան

Ապարանից մեկնարկած քայլերթի հետ դեպի Երևան եկող ՀՅԴ անդամ, ԱԺ «Հայաստան» խմբակցության պատգամավոր Արթուր Խաչատրյանի ուշադրությունը գրավել էր մի հանգամանք, որի մասին էլ խոսեց ուղիղ եթերում՝ հայտնում է Yerkir.am-ը։

Նա պատմեց, որ մի թանկանոց մեքենայից միջին տարիքի մի տղամարդ, տեսնելով Արցախի դրոշը, գոռացել էր՝ Արցախ եք ուզում, գնացեք Արցախ։ Եվ քանի որ այդ մարդը չէր կանգնել, որ Արթուր Խաչատրյանը նրան հասկացնի պետության և ցեղախբի տարբերությունը՝ պատգամավորը հրապարակային պատասխանեց նրան ու մյուսներին, ովքեր այդ կարծիքի են։

«Մեր այս երթում կան 44-օրյա պատերազմին մասնակցածներ և հին գվարդիայի ներկայացուցիչներ, ովքեր դեռ 1989 թ-ից են մասնակցել Արցախյան պատերազմին։ Պետությունը կազմակերպված ամբողջություն է և ունի բանակ, պետական քաղաքականություն և բանակը պետք է իրականացնի պետական քաղաքականությունը։ Հայ ժողովուրդը այն  եզակի երջանիկ ժողովուրդներից է, որն ունի պետականություն և բոլոր այն վայ-հայրենասերները, ովքեր ասում են՝ գնացեք Արցախ, նախ՝ մեծամասամբ նրանք են, ովքեր երբեք Արցախում չեն եղել, և չեն հասկանում, որ պետությունը պետք է հզոր լինի, որ պաշտպանի իր ազգային շահերը։

Վերջապես, Արցախը հրապարակային բուլվար չէ, որ ամեն մեկը վեր կենա, պապուց մնացած որսորդական հրացանը վերցնի և գնա ինքնապաշտպանական ջոկատ կազմի, պայքարի ադրբեջանական տանկերի դեմ։ Ուստի, սիրելի հայրենակիցներ, բոլոր նրանք, ովքեր մտահոգված են Արցախի ճակատագրով, ովքեր իրականում մտահոգված են ՀՀ սահմանների անձեռնմխելիությամբ, պետք է ոչ թե դեմագոգիկ պնդումներ անեն, որ Արցախ եք ուզում՝ գնացեք Արցախ, այլ պահանջեն, որ Հայաստանում ձևավորվի այնպիսի իշխանություն, որը պատարստ լինի պաշպանել մեր ազգային շահերը, Արցախը, Հայաստանը, որովհետև առանց Արցախի չկա Հայաստան, և առանց Հայաստանի չկա Արցախ»,-բացատրեց Արթուր Խաչատրյանը։

Նշենք, որ ապակենտրոն, ցանցային «Դիմադրություն» շարժման պայքարի շրջանակում իրազեկման ակցիաներ են տեղի ունենում մայրաքաղաքի տարբեր հատվածներում։ Զուգահեռ խորհրդանշական 4 վայրերից՝ Իջևանից, Տիգրանաշենից, Սարդարապատից ու Ապարանից արժանապատիվ քաղաքացիները քայլերթերով շարժվում են դեպի Երևան։

Մանրամասն՝ տեսանյութում․