Ռուսաստանը պատժամիջոցներ է սահմանել ԱՄՆ Կոնգրեսի և Կանադայի Սենատի անդամների նկատմամբ

Ռուսաստանը պատժամիջոցներ է սահմանել ԱՄՆ Կոնգրեսի Ներկայացուցիչների պալատի 398 անդամների նկատմամբ։ Այս մասին ասվում է ՌԴ արտաքին գործերի նախարարության հայտարարության մեջ։

Հաղորդագրության համաձայն՝ այս քայլն արվել է որպես հակառուսական պատժամիջոցների պատասխան։

«Ի պատասխան հակառուսական պատժամիջոցների հերթական «ալիքի», որը Ջո Բայդենի վարչակազմը մարտի 24-ին սահմանել է ՌԴ Դաշնային ժողովի Պետդումայի 328 պատգամավորների նկատմամբ, որը, հաշվի առնելով նախկինում սև ցուցակում ներառված ռուս խորհրդարանականներին, կազմում է գործնականում գրեթե ամբողջ կազմը, «հայելային» պատժամիջոցների սահմանափակումներ են մտցվում ԱՄՆ Կոնգրեսի Ներկայացուցիչների պալատի 398 անդամների նկատմամբ»,- ասվում է ՌԴ ԱԳՆ հայտարարության մեջ։

Նշվում է, որ այդ անձինք, այդ թվում՝ Կոնգրեսի ստորին պալատի ղեկավարությունն ու հանձնաժողովների նախագահները, մշտական կարգով ներառվում են ռուսական «սև ցուցակում»։

Բացի դրանից՝ Ռուսաստանը պատժամիջոցներ է սահմանել կանադացի 87 սենատորների նկատմամբ։ Այս մասին հայտնում է ՌԴ ԱԳՆ կայքը։

Գերատեսչությունում նշել են, որ սենատորներն ընդգրկված են ռուսական ցուցակում մշտական հիմունքներով՝ ի պատասխան Մոսկվայի դեմ Օտտավայի ձեռնարկած թշնամական քայլերի։

Սահմանափակիչ միջոցները ներառում են, ի թիվս այլ բաների, Ռուսաստան մուտքի արգելքը։