Անհրաժեշտ է քննարկել նաև խաղաղապահ զորախմբի գործառույթների ընդլայնման հնարավորությունը․ Բեգլարյան

Արցախի պետնախարար Արտակ Բեգլարյանը, անդրադառնալով Արցախի ԱԽ կողմից ՌԴ նախագահ Վլադիմիր Պուտինին հասցեագրված նամակին, առանձնացրել է առանցքային կետերը, որոնց շուրջ համաձայնության գալու դեպքում հնարավոր կլինի ապահովել Արցախի բնակչության անվտանգությունը։ Այդ համատեքստում կարևորվում է խաղաղապահ զորախմբին անհրաժեշտ լծաների տրամադրումը՝ այդ թվում ռազմական։

Երեկ նամակ գրելով ՌԴ նախագահ Վլադիմիր Պուտինին՝ Արցախի Անվտանգության խորհուրդը՝ նախագահ Արայիկ Հարությունյանի գլխավորությամբ, նպատակ էր հետապնդում նրա ուշադրությունը հրավիրել Փառուխ գյուղի և Քարագլուխ բարձունքի հանդեպ Ադրբեջանի ագրեսիայի վրա, քանի որ այդ տարածքն ամբողջությամբ գտնվում է ռուս խաղաղապահների պատասխանատվության գոտում։

Մենք հուսով ենք, որ Ռուսաստանի ջանքերի շնորհիվ այդ ագրեսիայի հետևանքները կվերացվեն և ադրբեջանական զորքերը հետ կքաշվեն ելման դիրքեր։ Այդ կապակցությամբ ողջունելի է ՌԴ պաշտպանության նախարարության երեկվա հայտարարությունը։

Նամակում նաև խնդրում ենք մեծացնել Արցախում խաղաղապահ զորախմբի մարդկային և տեխնիկական ներկայությունը, ինչը կօգնի ավելի արդյունավետ խաղաղապահ առաքելություն իրականացնել շուրջ 500 կմ-անոց շփան գծի երկայնքով։

Անհրաժեշտ է քննարկել նաև խաղաղապահ զորախմբի գործառույթների և մեխանիզմների ընդլայնման հնարավորությունը, որպեսզի նրանք ունենան բոլոր անհրաժեշտ լծակները (այդ թվում և ռազմական), որպեսզի արդյունավետորեն երաշխավորեն Արցախի բնակչության անվտանգությունը։