Բայդենը զգուշացրել է Ցզինպինին Ուկրաինայում ՌԴ-ին օգնություն ցուցաբերելու հետևանքների մասին

Սպիտակ տունը հայտնել է, որ ԱՄՆ նախագահ Ջո Բայդենը Չինաստանի առաջնորդ Սի Ցզինպինին զգուշացրել է, Ուկրաինայի իրադարձությունների ֆոնին, Ռուսաստանին օգնություն ցուցաբերելու հետեւանքների մասին։ Այս մասին հայտնում է «ՌԻԱ Նովոստի»-ն՝ հղում անելով ԱՄՆ վարչակազմի բարձրաստիճան ներկայացուցչի։

«Բայդենը հասկացրել է, որ հետևանքներ կլինեն, եթե Չինաստանը օգնություն ցուցաբերի Ռուսաստանին»,- ասել է նա ճեպազրույցում։

Սպիտակ տունը հավելել է, որ Բայդենը սպառնացել է արձագանքել ոչ միայն Միացյալ Նահանգների, այլև «ամբողջ աշխարհի» անունից։ Պաշտոնյան չի հստակեցրել, թե ինչ միջոցների մասին կարող է խոսք լինել։

Ավելի վաղ Սի Ցզինպինը Բայդենի հետ տեսազանգի ժամանակ կոչ էր արել ԱՄՆ-ին` աշխատել Չինաստանի հետ՝ խաղաղությունը պահպանելու և «իր միջազգային պատասխանատվությունը խստորեն կրելու» համար։