Ռուսաստանի և Հայաստանի ձեռներեցները կկարողանան ստեղծված իրավիճակում գտնել ճիշտ բալանսը. Սամվել Կարապետյան

«Տաշիր» ընկերությունների խմբի նախագահ, Հայ ձեռներեցների ասոցիացիայի նախագահ Սամվել Կարապետյանը դիմել է Ռուսաստանի և Հայաստանի ձեռներեցներին:

«Միջազգային հարաբերություններում տիրող իրավիճակը շատ մտահոգում է բոլորիս։ Առաջին անգամը չէ, որ դժվար ժամանակներ ենք ապրում և լավ գիտենք, որ ցանկացած ճգնաժամ ավարտվում է՝ իր տեղը զիջելով նոր հեռանկարներին։ Ուստի այսօր մեր պարտքն է լինել հնարավորինս միասնական, հանգստություն պահպանել, շարունակել հետագա զարգացման ուղին։

Պատմությունը ցույց է տալիս, որ դժվար ժամանակները մեզ «մաքրում են» հնացած մոդելներից և բիզնես վարելու եղանակներից՝ թույլ տալով տեսնել նոր լուծումներ եւ ուղիներ։

Համոզված եմ, որ Ռուսաստանի և Հայաստանի ձեռներեցները կկարողանան ստեղծված իրավիճակում գտնել ճիշտ բալանսը և լրացուցիչ հնարավորություններ ստեղծել ավելի սերտ համագործակցության համար։ Մենք արագ կարձագանքենք այն ամենին, ինչ տեղի է ունենում տնտեսությունում, աջակցություն կցուցաբերենք բիզնեսին և կշարունակենք ամրապնդել մեր գործարար կապերը»,- ասված է ուղերձում։