ԵԽ հանձնակատարը կոչ է արել Ադրբեջանի նախագահին՝ վերանայման վերադարձնել լրատվամիջոցների մասին սկանդալային օրենքը

Եվրախորհրդի մարդու իրավունքների հանձնակատար Դունյա Միյատովիչը այսօր հրապարակած նամակում կոչ է արել Ադրբեջանի նախագահ Իլհամ Ալիևին՝ լրատվության մասին վերջերս ընդունված օրենքը վերադարձնել խորհրդարան՝ վերանայման: Այս մասին հայտնում է Turan-ը։

Նամակում հանձնակատարը խոր մտահոգությունն է հայտնում, որ նոր օրենքն ընդունվել է առանց լայն և բովանդակալից խորհրդակցությունների․ այն չի համապատասխանում  մարդու իրավունքների, խոսքի ազատության և լրատվամիջոցների ազատության ոլորտում միջազգային չափանիշներին։

Օրենքը չափից դուրս կանոնակարգում է ԶԼՄ-ների աշխատանքը և լրագրողի մասնագիտությունը, ինչը հակասում է ազատ, անկախ, գրաքննության չենթարկվող լրատվության և բազմակարծության սկզբունքներին։

«Ընդունված օրենքն էլ ավելի է վատացնում խոսքի և լրատվամիջոցների ազատության հետ կապված իրավիճակը։ Այն լիազորում է պետական մարմիններին՝ անհիմն սահմանափակել լրագրողների աշխատանքը լիցենզավորման միջոցով: Այն նաև հնարավորություն է տալիս սահմանափակումներ մտցնելու մեդիա ընկերությունների և կազմակերպությունների ֆինանսական, իրավական և օպերացիոն գործունեության վրա»,- գրում է Միյատովիչը՝ ընդգծելով օրենսդրությունը խոսքի և լրատվամիջոցների ազատության միջազգային ու եվրոպական չափանիշներին համապատասխանեցնելու անհրաժեշտությունը։