Թյուրքական պետությունները պետք է միասնական զինված ուժեր ստեղծեն. թուրք գեներալ

«Թյուրքական պետությունների կազմակերպությունը պետք է անհապաղ քայլեր ձեռնարկի միասնական զինված ուժեր ստեղծելու համար»։ Այս մասին Türkiye թերթին տված հարցազրույցում հայտարարել է թուրքական բանակի պաշտոնաթող բրիգադային գեներալ Յուջել Քարաուզը։

Թուրք գեներալը նշել է, որ Թյուրքական պետությունների կազմակերպությունը պետք է շտապ պատվիրակություն ուղարկի Ղազախստան. «Թյուրքական պետությունները պետք է անհապաղ պատվիրակություն ուղարկեն Ղազախստան՝ իրավիճակը վերահսկելու համար։ Կազմակերպության անդամ երկրների արտաքին գործերի նախարարները պետք է շտապ հանդիպեն։ Առաջիկա ամիսներին կայանալիք հանդիպմանը պետք է օրինական միջոցներ ձեռնարկել թյուրքական երկրների միասնական ռազմական ուժ ստեղծելու համար և կոնկրետ քայլեր ձեռնարկել այդ ուղղությամբ»,- ասել է նա։

Քարաուզը հավելել է, որ համատեղ ռազմական ուժը թուրքական աշխարհի համար նույնքան կարևոր է, որքան քաղաքական և տնտեսական ինտեգրումը։