Արմավիրը միակ համայնքն է, որտեղ միայն ՔՊ-ն է ցուցակ առաջադրել. այստեղ մասնակցությունը 1,87 տոկոս է

ԿԸՀ-ի հրապարակած տվյալների համաձայն՝ ժամը 11-ի դրությամբ Հայաստանի 36 համայնքներում ամենացածր մասնակցությունը գրանցվել է Արմավիրում, որտեղ 3 ժամում ընտրություններին մասնակցել է ընտրողների ընդամենը 1,87 տոկոսը կամ 808 ընտրող:

Բանն այն է, որ Արմավիրը միակ համայնքն է, որտեղ ընտրություններին մասնակցելու հայտ է ներկայացրել միայն «Քաղաքացիական պայմանագիրը»:

Մասնակցության ցածր ցուցանիշով Արմավիրին հաջորդում է Վաղարշապատը։ Այստեղ քվեարկել է ընդամենը 1359 մարդ կամ ընտրողների 3.14 տոկոսը։ Ցածր մասնակցության առումով երրորդ տեղում է Արմավիրի Խոյ համայնքը, որտեղ ընտրություններին մասնակցել է  ընտրողների 3.16 տոկոսը։

Ամենաբարձր մասնակցությունը եղել է Լոռու մարզի Թումանյան համայնքում՝ 16,07 տոկոս, երկրորդ տեղում Նոյեմբերյանն է՝ 11.11 տոկոս, իսկ երրորդ տեղում՝ Ապարանը՝ 11.08 տոկոս:

Ընդհանուր առմամբ, 36 համայնքներում մասնակցությունը կազմել է 6.15 տոկոս։