Թուրքիայի ՊՆ ղեկավարը Հայաստանին կոչ է արել հրաժարվել «թշնամական քաղաքականությունից» և ընդունել «3+3» ձևաչափը

Թուրքիան կոչ է անում Հայաստանին՝ հրաժարվել թշնամական քաղաքականությունից և միանալ 3+3 տարածաշրջանային համագործակցության հարթակին. Արցախի 75 տոկոսի օկուպացիայի օրվա առթիվ ելույթում ասել է Թուրքիայի ազգային պաշտպանության նախարար Հուլուսի Աքարը։

Նրա խոսքով՝ Ադրբեջանի և Թուրքիայի նախագահները իբր «դրսևորել են շատ կառուցողական մոտեցում՝ ուղղված ապագա սերունդների համար խաղաղ կյանք ստեղծելուն, և դուռ են բացել դեպի կայունության և համագործակցության վրա հիմնված նոր դարաշրջան»։

«Մենք ակնկալում ենք, որ հայ պաշտոնյաները, հրաժարվելով իրենց ներկայիս քաղաքականությունից, կօգտագործեն այս պատմական հնարավորությունը, այդ թվում՝ 3+3 հարթակի՝ մեր առաջարկը»,- ասել է Աքարը։

Նախարարը հավելել է, որ Ղարաբաղում պատերազմն ավարտվել է, և «սկսվել է նոր պայքար՝ Կովկասում կայուն խաղաղություն ապահովելու համար»։

«Այս առումով Շուշիի հռչակագիրը ամուր քայլ է դեպի ապագա: Բոլորը պետք է իմանան, որ ապագան չի կարելի կառուցել ատելության և հիշաչարության վրա։ Հայաստանը պետք է դադարեցնի թշնամանքը և նայի դեպի ապագան։ Մեր կողմից մենք կշարունակենք մեր ջանքերը տարածաշրջանում խաղաղություն, հանգստություն և կայունություն ապահովելու համար»,- ընդգծել է Աքարը։