Թուրքիան շատ մեղքեր է գործել Սիրիայում. թուրք պատգամավորը մեղադրել է Չավուշօղլուին

Հակաքրդական ֆոբիան լուրջ սխալների է հանգեցրել Թուրքիային սիրիական քաղաքականության մեջ։ Թուրքիան Սիրիայում բազմաթիվ մեղքեր է գործել.  Թուրքիայի խորհրդարանի պլանավորման եւ բյուջետային հանձնաժողովի նիստում ասել է գլխավոր ընդդիմադիր Հանրապետական-ժողովրդական կուսակցության անդամ Մեհմեդ Բեքարօղլուն։

Ընդդիմադիր պատգամավորը սուր քննադատության է ենթարկել Թուրքիայի արտաքին քաղաքականությունը՝ ծաղրելով այն պնդումները, թե թուրքական զորքերը Սիրիա են մտել Թուրքիայի ներքին անվտանգությունն ապահովելու համար։

«Ինչպե՞ս ստեղծվեցին պայմաններ Սիրիա մտնելու համար։ Ինչպե՞ս Սիրիան դադարեց մեկ պետություն լինելուց և բաժանվեց երեք մասի։ Սիրիայում մենք բազմաթիվ մեղքեր ենք գործել. Զոհվել է 600 հազար մարդ, որից 50 հազարը երեխաներ են։ 7 միլիոն մարդ կորցրեց իր տունն ու հայրենիքը»,- ասել է պատգամավորը՝ ընդգծելով, որ ամեն ինչում մեղավոր են նաև թուրքական իշխանությունները։

Պատգամավոր Բեքարօղլուն դիմել է Թուրքիայի արտգործնախարար Մևլութ Չավուշօղլուին. «Սա ձեր անձնական մեղքն է։ Մեղքը բարդելով պարոն Ահմեդ Դավութօղլուի վրա՝ չեք փրկվի, դուք այս ամենը միասին եք արել»։