Անկարան պատրաստ է Երեւանի հետ հարաբերությունների կարգավորման գործընթացին. Չավուշօղլու

Թուրքիան ակտիվորեն շփվում է Ռուսաստանի հետ բազմաթիվ արդիական հարցերի շուրջ, այդ թվում՝ Սիրիայում, Լիբիայում և Ղարաբաղում իրավիճակի։ Կան դիրքորոշումների տարբերություններ, սակայն կողմերը հավատարիմ են մնում կառուցողական երկխոսությանը՝ ազգային շահերից բխող զգայուն հարցերի փոխադարձ դիտարկմամբ։ Դա, մասնավորապես, վերաբերում է Ուկրաինային։ Այս մասին հինգշաբթի Անկարայում խորհրդարանական պլանավորման եւ բյուջետային հանձնաժողովի նիստում հայտարարել է Թուրքիայի արտգործնախարար Մևլյութ Չավուշօղլուն։ 

Նա ընդգծել է, որ Թուրքիան չի ճանաչել և չի ճանաչում Ղրիմի անօրինական բռնակցումը և շարունակելու է վերահսկել Ղրիմի թաթարների անվտանգության և բարեկեցության հարցը։

Անդրադառնալով Հարավային Կովկասում տիրող իրավիճակին՝ Չավուշօղլուն նշել է, որ տարածաշրջանում փոփոխությունների ու վերափոխումների հույս կա, և պատերազմի ավարտով «տարածաշրջանը երկարաժամկետ խաղաղության պատմական հնարավորություն է ստացել»։ Ըստ նրա՝ Անկարան պատրաստ է Երեւանի հետ հարաբերությունների կարգավորման գործընթացին։ «Մենք հուսով ենք, որ Հայաստանը կօգտագործի այս հնարավորությունը՝ տարածաշրջանում խաղաղության և զարգացման համար»,- ասել է թուրք նախարարը։

Թուրքական դիվանագիտության ղեկավարը նաև նշել է, որ Անկարայի արտաքին քաղաքականության առաջնահերթ ուղղություններից մեկը Կենտրոնական Ասիայի երկրների հետ փոխգործակցությունն է։

Չավուշօղլուն հիշեցրել է, որ անցյալ տարի Սամարղանդում բացվել է Թուրքիայի գլխավոր հյուպատոսությունը, և ազգային ավիափոխադրող Turkish Airlines-ը կանոնավոր թռիչքներ է սկսել դեպի Թուրքեստան քաղաք, որտեղ ծնվել է հայտնի թուրք սուֆի բանաստեղծ և մտածող Խոջա Ահմեդ Յասավին։

«Մենք նպատակ ունենք նաև մեծացնել թյուրքալեզու պետությունների համագործակցության խորհրդի (Թուրքական խորհրդի) նշանակությունը՝ որպես միջազգային կազմակերպություն։ Սեպտեմբերի վերջին, Թուրքիայի արտգործնախարարության կազմակերպչական աջակցությամբ, Ստամբուլում կայացել է թյուրքալեզու պետությունների դիվանագիտության ղեկավարների հանդիպումը, իսկ նոյեմբերի 12-ին նախատեսվում է կազմակերպության ղեկավարների գագաթնաժողովը»,- ասել է Չավուշօղլուն։