Քրեակատարողական ծառայության նորանշանակ պետը կառույցն սկսել է «համալրել» իր ընկերներով (168.am)

168.am-ի տեղեկություններով՝ Քրեակատարողական ծառայության նորանշանակ պետ Սերգեյ Ատոմյանը ծառայությունն սկսել է «համալրել» նոր կադրերով։

Ըստ լրատվամիջոցի՝ արդարադատության նախարար Կարեն Անդրեասյանը Ծառայության միայն մեկ տեղակալ է նշանակել և հակված չէ շատերին փոխել, սակայն նախարարի տրամադրվածությունը Սերգեյ Ատոմյանի համար, ըստ ամենայնի, ոչ մի նշանակություն չունի։ Նա փոխվարչապետ Սուրեն Պապիկյանի մտերիմներից է և կարիք չունի որևէ բան անելիս հարցնել նախարարի համաձայնությունը։

168․ am-ի տվյալներով՝ քննչականից արտահոսք է սկսվել ՔԿԾ․ իր ընկեր քննիչներին համակարգ է բերում նոր պետը։ Բացի գործընկեր քննիչներից, Սերգեյ Ատոմյանը համակարգ է բերում նաև մեծ թվով  համերկրացիների` արտաշատցիների, որոնք արդեն սկսել են իրենց կարգերը հաստատել Ծառայությունում։

Ատոմյանի ամենաուշագրավ որոշումներից է Ծառայության պետի խորհրդականի նշանակումը․ նոր խորհրդականը մինչև համակարգ գալը երկար տարիներ աշխատել է «Ջրմուղում»։

Մոտ օրերս կլինեն կարևոր վերջնական նշանակումները։ Այս պահի դրությամբ ևս երկու տեղակալ է լքել Ծառայությունը։ ՔԿԾ-ին հրաժեշտ են տվել պետի առաջին տեղակալ Արտակ Հարությունյանը, ինչպես նաև մյուս տեղակալ Գագիկ Մարկոսյանը։

Արտակ Հարությունյանի փոխարեն ՔԿԾ պետի առաջին տեղակալ է նշանակվել Ատոմյանի ընկերը` Արարատի մարզային քննչական վարչության պետ Ամբակում Գրիգորյանը։