Վրաստանի վարչապետը սպառնում է Սահակաշվիլիի մեղադրանքներն ավելացնել, եթե նա իրեն լավ չպահի

Թող իրեն լավ պահի, հակառակ դեպքում՝ մենք այլ հոդվածներ կավելացնենք նրա նկատմամբ և նրա հետևից ուրիշներին կուղարկենք.  Վրաստանի վարչապետ Իրակլի Ղարիբաշվիլին այսպես է արձագանքել Միխեիլ Սահակաշվիլիի նամակին` ուղղված «Միացյալ ազգային շարժման» նախագահ և Թբիլիսիի քաղաքապետի թեկնածու Նիկա Մելիային: 

Ուղերձը կարդացվել է «Իմեդի» հեռուստաալիքի եթերում, որին հրավիրված է եղել վարչապետը:

Ղարիբաշվիլին ասել է, որ Սահակաշվիլին հիվանդ է և բուժման կարիք ունի: «Այն, որ այս մարդը ինը տարի նախագահ էր, աղետ էր»,- ասել է կառավարության ղեկավարը՝ հավելելով, որ 18 տարի Սահակաշվիլին ապակայունացման աղբյուր էր:

«Ինչպես ասում են՝ սատանան հետապնդում է նրան: Գոնե առնվազն վեց տարի հանգստանա բանտում»,- հավելել է Ղարիբաշվիլին:

Ավելի վաղ՝ հոկտեմբերի 1-ին, երբ Սահակաշվիլին ձերբակալվել էր, նույն «Իմեդի»-ի եթերում, վարչապետն ասել էր, որ սահմանների անօրինական հատման վերաբերյալ հոդվածը նախկին նախագահին կավելացվի որպես «բոնուս»: Հիշեցնենք նաև, որ Վրաստանի նախկին նախագահն արդեն դատարանի կողմից մեղավոր է ճանաչվել երեք հոդվածներով՝ 25 (հանցագործների և հանցակիցների պատասխանատվություն), 117 (դաժան մարմնական վնասվածքներ հասցնելը) և 333 (պաշտոնական լիազորությունների գերազանցում): Բացի դրանից՝ Սահակաշվիլիի դեմ հետաքննություն է սկսվել 344 հոդվածով (պետական սահմանի ապօրինի հատում): Նախկին նախագահը ներգրավված է նաև այլ քրեական գործերում: