Թուրքիան կշարունակի գազի որոնումները Սև ծովում. Էրդողան

Թուրքիան կշարունակի Սև ծովում բնական գազի հանքավայրերի հետազոտումը: Այս մասին հայտարարել է Թուրքիայի նախագահ Ռեջեփ Թայիփ Էրդողանը՝ տեսաուղերձով դիմելով Սաքարիա նահանգի սևծովյան շելֆի փորձնական հորատանցքից արտահանված գազի առաջին այրման արարողության մասնակիցներին:

Նրա խոսքով՝ Անկարան մտադիր է զգալիորեն նվազեցնել իր կախվածությունը «կապույտ վառելիքի» արտաքին մատակարարումներից Սև ծովի գազի արդյունահանման միջոցով:

«Հորատանցքերը, որոնք մենք փորել ենք Սև ծովում, ոչ առաջինն են, ոչ էլ վերջինը: Մոտ ապագայում սևծովյան գազի արդյունահանման մեկնարկով մենք զգալիորեն կնվազեցնենք մեր կախվածությունը օտարերկրյա աղբյուրներից»,- ասել է Թուրքիայի նախագահը՝ հավելելով․ «Այսօր մենք առաջին անգամ ենք այրում Սև ծովի գազը, որը հայտնաբերեցինք և սկսեցինք արդյունահանել մի քանի հարյուր մետր խորությունից»։

Երկրի ղեկավարը նշել է, որ Թուրքիան հորատման աշխատանքներ է իրականացրել Սև ծովում՝ չնայած պատժամիջոցներին, սպառնալիքներին, շանտաժին և ահաբեկման միջոցով դրանք կանխելու բոլոր փորձերին:

Էրդողանը մատնանշել է, որ շնորհիվ տեխնիկական հնարավորությունների, որոնց հասել է Թուրքիան հորատման աշխատանքներում, Թուրքիային հաջողվել է դադարեցնել արտաքին կախվածությունն այս ոլորտում:

«Նախկինում մենք հորատման աշխատանքներ էինք իրականացնում միջազգային լիզինգային ընկերությունների հետ: Այժմ մենք այդ աշխատանքներն իրականացնում ենք մեր սեփական նավերով և մեր մարդկային ռեսուրսներով»,- ասել է նա:

Էրդողանի խոսքով՝ Թուրքիան ներկայումս ինտենսիվ ջանքեր է գործադրում մինչև 2023 թվականը սևծովյան գազի մշակման առաջին փուլը սկսելու համար: