Ռուսաստանը կօգնի Տաջիկստանին, եթե Աֆղանստանից ծայրահեղականներ գան այնտեղ

Ռուսաստանը պատրաստ է ցանկացած օգնություն ցուցաբերել Տաջիկստանին՝ ինչպես ՀԱՊԿ-ի, այնպես էլ երկկողմանի հիմքերով, Աֆղանստանից ծայրահեղականների ներթափանցման դեպքում: Այս մասին «Կոմերսանտ»-ին տված հարցազրույցում հայտարարել է Տաջիկստանում Ռուսաստանի դեսպան Իգոր Լյակին-Ֆրոլովը:

«Աֆղանստանում ռազմաքաղաքական իրավիճակի դեգրադացիան՝ կապված ԱՄՆ-ՆԱՏՕ զորքերի դուրսբերման և այս երկրի հյուսիսում «Թալիբան» շարժման հարձակման հետ, երկրի ղեկավարության շրջանում որոշակի անհանգստություն է առաջացնում: Այնուամենայնիվ, մենք չենք տեսնում որևէ խուճապ, բայց, ընդհակառակը, տեսնում ենք Տաջիկստանի իշխանությունների վճռականությունը՝ ամեն կերպ ամրապնդել տաջիկա-աֆղանական սահմանը, որպեսզի կանխվի ծայրահեղականների ցանկացած ներթափանցում Աֆղանստանի տարածք»,– ասել է դեսպանը։

Նա հավելել է, որ ռուսական կողմը մասնակցում է տաջիկա-աֆղանական սահմանն ամրապնդելու ջանքերին: «Մասնավորապես, մոտ ապագայում նախատեսվում է սկսել Շուրուաբադի ուղղությամբ սահմանային պահակակետերից մեկի շինարարությունը»,- ասել է Լյակին-Ֆրոլովը:

«Երկարաժամկետ պայմանագրերի հիման վրա Ռուսաստանն իրականացնում է Տաջիկստանի Հանրապետության զինված ուժերի արդիականացման ծրագիրը` մեր տաջիկ ընկերներին ժամանակակից զենք և ռազմական տեխնիկա մատակարարելով»,- ասել է դեսպանը` պատասխանելով հարցին, թե ինչ միջոցներ է կիրառում Ռուսաստանը, որպեսզի օգնի Տաջիկստանին՝ ամրապնդել իր սահմանը հարևան Աֆղանստանից եկող սպառնալիքների ֆոնին:

«Ռուսաստանի ղեկավարությունը բազմիցս հայտարարել է, որ նման փորձերի դեպքում ցանկացած անհրաժեշտ օգնություն կտրամադրի մեր ռազմավարական գործընկեր Տաջիկստանին՝ ինչպես երկկողմ, այնպես էլ ՀԱՊԿ-ի միջոցով»,- ասել է դեսպանը հարցազրույցում:

«Ռուսաստանը, ինչպես նաև ՀԱՊԿ-ն, ընդհանուր առմամբ, պատրաստ են Աֆղանստանի տարածքից ակնհայտ ագրեսիվ գործողությունների դեպքում անհրաժեշտ օգնություն տրամադրել Տաջիկստանին: Ի դեպ, հենց դրա համար են ստեղծվել ՀԱՊԿ-ի Արագ արձագանքման հավաքական ուժերը: Այնուամենայնիվ, ՀԱՊԿ-ի կողմից նման արձագանքի մասին խոսելը դեռ վաղ է», - ասել է դիվանագետը:

Նա նշել է, որ Տաջիկստանի հետ համապատասխան համաձայնագրի հիման վրա երկրում տեղակայված է 201-րդ ռուսական ռազմակայանը, որը Հավաքական անվտանգության պայմանագրի կազմակերպության պատասխանատվության գոտու հարավային սահմանների անվտանգության և կայունության երաշխավորն է: