Ռուսաստանը կօգնի Երևանին ու Բաքվին սահմանային կարգավորման հարցում, եթե երկուստեք խնդրեն. ՌԴ ԱԳՆ

Ռուսաստանն օգնություն կցուցաբերի Հայաստանին և Ադրբեջանին սահմանին առկա լարվածության կարգավորման հարցում, եթե նման խնդրանք լինի երկու պետություններից էլ: Այս մասին երկուշաբթի լրագրողներին հայտնել է Ռուսաստանի փոխարտգործնախարար Անդրեյ Ռուդենկոն:

«Նորմալ իրավիճակ է, երբ նման իրադրությունում գտնվող կողմերը դիմում են մեր օգնությանը, համագործակցությանը, միջնորդությանը, մանավանդ, որ մենք փորձ ունենք նոյեմբերի 9-ի և հունվարի 11-ի հայտարարություն մշակելու համատեքստում: Այդ իսկ պատճառով, եթե բոլոր մասնակիցների, այլ ոչ թե միայն կողմերից որևէ մեկի կողմից, նկատի ունեմ՝ Ադրբեջանից և Հայաստանից, նման դիմում գա, ապա մենք պատրաստ կլինենք տրամադրել այն օժանդակությունը, որը կարող ենք»,- ասել է նա՝ պատասխանելով ՏԱՍՍ-ի հարցին:

Ռուդենկոն ասել է, որ Հավաքական անվտանգության պայմանագրի կազմակերպության (ՀԱՊԿ) անդամ պետությունների արտգործնախարարները մայիսի 19-ին Դուշանբեում կքննարկեն հայ-ադրբեջանական սահմանին տիրող լարվածությունը:

«Արտաքին գործերի նախարարները հավաքվում են Դուշանբեում`քննարկելու օրակարգի բոլոր հարցերը: Չեմ բացառում, որ այդ հարցը կքննարկվի այնտեղ,- ասել է նա՝ պատասխանելով ՏԱՍՍ-ի հարցին:- Կարծում եմ, որ հիմնական քննարկումը տեղի կունենա Դուշանբեում՝ նախարարների հանդիպման շրջանակներում»: