«Նամախվանի» ՀԷԿ-ի նախագիծը չի շարունակվի ներկայիս պայմաններում. Վրաստանի վարչապետ

«Նամախվանի» հիդրոէլեկտրակայանի շինարարությունը ներկայիս պայմաններում չի շարունակվի. հայտարարել է Վրաստանի վարչապետ Իրակլի Ղարիբաշվիլին:

Նրա խոսքով՝ ներկայումս բանակցություններ են տարվում ներդրողի հետ Վրաստանի համար ավելի բարենպաստ պայմաններով հիդրոէլեկտրակայանը կառուցելու շուրջ:

«Ես կարող եմ ձեզ ասել, որ մենք նախագիծը չենք շարունակելու նման պայմաններով: Մենք խոսում ենք ներդրողի հետ: Հուսով եմ, որ  ներդրողի հետ կհամաձայնենք մեր երկրի համար բարենպաստ պայմանների հարցում, որպեսզի էլ ավելի լավ պայմաններում հիդրոէլեկտրակայան կառուցենք»,- Քութայիսում նորացված միջազգային օդանավակայանի պաշտոնական բացումից հետո լրագրողներին ասել է Ղարիբաշվիլին:

Վրաց վարչապետի կարծիքով՝ նոր պայմանները պետք է համապատասխանեն բոլոր քաղաքացիների պահանջներին, նույնիսկ նրանց, ովքեր դեմ են հիդրոէլեկտրակայանների կառուցմանը:

Ղարիբաշվիլին, որը վարչապետ էր նշանակվել 2021 թվականի փետրվարին Գիորգի Գախարիայի անսպասելի պաշտոնանկությունից հետո, նշել է, որ «ժառանգել է այս նախագիծն ու այս խնդիրը և ակտիվորեն աշխատում է դրա վրա»:

Հիշեցնենք, որ թուրքական «Էնկա» կազմակերպությունն է կառուցում «Նամախվանի» ՀԷԿ–ը։ Դրա դեմ են պայքարում բազմաթիվ վրացիներ՝ նշելով, որ շինարարությունը կհանգեցնի բնապահպանական աղետի։