Թուրքիայում 30 միլիոն մարդ ապրում է աղքատության շեմից ցածր․ HDP

Թուրքիայի քրդամետ HDP-ի (Ժողովրդադեմոկրատական կուսակցություն) Աշխատանքի պաշտպանության հանձնաժողովի համանախագահ Շազիյե Քյոսեն գրավոր հայտարարություն է տարածել՝ հաշվի առնելով սովի դեմ պայքարի շաբաթվա մեկնարկը, որը կգործի հունիսի 1-7-ը:

«Այսօր աշխարհում շուրջ 2,5 միլիարդ մարդ ապրում է աղքատության շեմից ցածր՝ սոված: Թուրքիայի աշխատող բնակչության 60% -ը ունի նվազագույն աշխատավարձի հավասար կամ ցածր եկամուտ, և առնվազն 20 միլիոն մարդ իրականում ապրում է աղքատության և սովի սահմաններից ցածր: Եթե աշխատանքից զրկվածներին գումարեք աղքատության շեմից ցածր գտնվողներին, այդ մարդկանց թիվը հասնում է 30 միլիոնի:

Բարձր գնաճը, պարենի գների արագ և կտրուկ աճը, գնողունակության անկումը, փոխարժեքների բարձրացման պատճառով գների աճը սով և աղքատություն են հարուցում Թուրքիայում՝ հասնելով պատմության ամենաբարձր մակարդակներից մեկին»,– ասել է Քյոսեն։