Թուրքիայի արտգործնախարարը երկօրյա այցով ժամանել է Էր Ռիադ՝ վերականգնելու սաուդա-թուրքական հարաբերությունները

Թուրքիայի արտգործնախարար Մևլյութ Չավուշօղլուն պաշտոնական այցով ժամանել է Սաուդյան Արաբիա: Այս մասին թուրք նախարարը հայտնել է Twitter-ում:

«Ես ժամանել եմ Սաուդյան Արաբիա՝ քննարկելու երկկողմ հարաբերությունները և տարածաշրջանային գործընթացները, ներառյալ՝ Իսրայելի գործողությունները Երուսաղեմի Ալ Աքսա մզկիթում»,- գրել է Չավուշօղլուն:

Թուրքիայի արտգործնախարարությունն ավելի վաղ հայտնել էր, որ թուրքական դիվանագիտության ղեկավարի այցը Էր Ռիադ տևելու է երկու օր: Նախատեսվում են բանակցություններ Չավուշօղլուի և սաուդյան դիվանագիտության ղեկավար, արքայազն Ֆեյսալ բին Ֆարհան բին Աբդուլլահ ալ Սաուդի միջև:

Հիշեցնենք, որ երկու երկրների հարաբերությունները վատթարացել էին 2018 թ. հոկտեմբերի սկզբին Ստամբուլում սաուդցի լրագրող Ջամալ Խաշոգջիի սպանությունից հետո։ Ներկայումս սաուդական թագավարությունը ոչ պաշտոնական բոյկոտի քաղաքականություն է իրականացնում Թուրքիայի նկատմամբ՝ թուրքական ապրանքների ներկրման ուղղությամբ սահմանափակումներ մտցնելով։