Հյուսիսային Կիպրոսի ՍԴ-ն արգելել է Ղուրանի դասընթացները, իսկ «նախագահը» խոստացել է շտկել ՍԴ-ի սխալը

Թուրքերի կողմից  զավթված Կիպրոսի հյուսիսային մասում ձևավորված Հյուսիսային Կիպրոսի թուրքական հանրապետության նախագահ Էրսին Թաթարը Թուրքիայի արտգործնախարար Մևլյութ Չավուշօղլուի հետ հանդիպմանը ժամանակ հայտարարել է. «Ես շատ դժգոհ եմ կատարվածից: Մենք՝ մուսուլմաններս, պայքարում ենք այս հողում մեր հավատքի համար՝ սկսած 1571 թվականից (օսմանցիների կողմից Կիպրոսը բռնազավթելու տարուց): Երբեք չի կարող լինել այնպիսի իրավիճակ, ինչպիսին է Ղուրանի դասընթացների փակումը: Իրավիճակն անմիջապես կշտկվի: Կրոնի ազատությունը սահմանադրական իրավունք է»։

Հիշեցնենք, որ ավելի վաղ Հյուսիսային Կիպրոսի Սահմանադրական դատարանը փաստացի որոշում էր կայացրել փակել Ղուրանի դասընթացները երկրում՝ հիմնավորմամբ, որ դրանք հակասում են աշխարհիկության սկզբունքին: Որոշմանը ծայրաստիճան բացասաբար են արձագանքել Թուրքիայի նախարարները, քաղաքական գործիչները և նախագահ Ռեջեփ Թայիփ Էրդողանը, իսկ Թուրքիայի աշխարհիկ հատվածը ողջունել է ՍԴ-ի որոշումը։