Վանա լճի՝ տիեզերքից արված լուսանկարը հայտնվել է ՆԱՍԱ-ի հայտարարած մրցույթի եզրափակիչում

Վանա լճի՝ տիեզերքից արված լուսանկարը հայտնվել է ՆԱՍԱ-ի (ԱՄՆ-ի Օդագնացության և տիեզերական տարածության հետազոտությունների ազգային գործակալություն) կազմակերպած լուսանկարների մրցույթի եզրափակիչում։ Այդ մասին հաղորդում է Akunq.net-ը՝ վկայակոչելով ռուսական «Սպուտնիկ» գործակալության թուրքերեն ծառայության կայքէջում հրապարակված լուրը։

Աղբյուրի փոխանցմամբ՝ նշյալ լուսանկարի հեղինակը տիզերագնաց Քեյթ Ռուբինսն է։ Վերջինս այդ պատկերն անմահացրել է 2016 թ․ սեպտեմբերի 12-ին։ Լուսանկարի հեղինակը Վանա լիճը բնութագրել է որպես աշխարհում աղի ջուր ունեցող ամենամեծ լիճ։

Լուսանկարների մրցույթին ի սկզբանե ներկայացված է եղել 32 լուսանկար, իսկ Վանա լճի լուսանկարի հետ եզրափակիչում է հայտնվել 2012 թ․ տիեզերագնաց Դոն Փեթիթի կողմից արված մի պատկեր, որում երևում են Ամերիկա մայրցամաքի ուղղությամբ շարժման մեջ գտնվող աստղեր։

Եզրափակիչում հայտնված լուսանկարներից մեկն ընտրելու համար քվեարկությունը նախատեսվում է կազմակերպել ապրիլի12-ին։

Թարգմանեց Մելինե Անումյանը

 Akunq.net