ԵՄ 27 երկրներ համաձայն են Ռուսաստանի դեմ նոր պատժամիջոցների կիրառմանը

Եվրամիության 27 երկրների դեսպանները հավանություն են տվել պատժամիջոցների կիրառմանը այն անձանց նկատմամբ, որոնք «պատասխանատու են» Ռուսաստանի ընդդիմության առաջնորդ Ալեքսեյ Նավալնիի վերաբերյալ կայացրած դատավճռի համար:

ՏԱՍՍ լրատվական գործակալությունը, վկայակոչելով եվրոպական դիվանագիտական աղբյուր, հաղորդել է, որ ԵՄ 27 երկրների դեսպանները երկուշաբթի պայմանավորվել են Ռուսաստանի դեմ լրացուցիչ պատժամիջոցների մասին Ալեքսեյ Նավալնիի շուրջ ստեղծված իրավիճակի պատճառով:

Ռուսաստանի արտգործնախարարության խոսնակ Մարիա Զախարովան անցած չորեքշաբթի հայտարարել էր, որ Ալեքսեյ Նավալնիի հետ կապված իրավիճակի պատճառով Ռուսաստանի քաղաքացիների դեմ պատժամիջոցները երկարաձգելու՝ ԵՄ որոշումը «կրկես» է և «նախապես խաղարկված սցենար»:

Ռուսաստանի արտգործնախարարությունը Բրյուսելին մեղադրել էր երկակի ստանդարտների մեջ՝ ասելով, որ վերջին տարիներին Եվրամիությունը պատժամիջոցներ և ճնշումներ է գործադրել Մոսկվայի հետ հարաբերությունների հարցում՝ անհեթեթ պատրվակով և հակառուսական կարծրատիպերի հիման վրա:

Ռուսաստանի և Եվրամիության հարաբերությունները վերջին ամիսներին սրվել են՝ կապված տարբեր խնդիրների, այդ թվում՝ Ալեքսեյ Նավալնիի դեպքի և Ռուսաստանի սահմանի մոտ ՆԱՏՕ-ի գործունեության հետ: Վերջերս Ռուսաստանի արտգործնախարար Սերգեյ Լավրովը հարցազրույցներից մեկի ժամանակ ասել էր, որ Մոսկվայի և Բրյուսելի հարաբերություններից ոչինչ չի մնացել: