Պենտագոնը խուսափել է թուրք լրագրողի՝ «քրդերի կողմից Թուրքիայի դեմ ահաբեկչությունները» մեկնաբանելու հարցից

Պենտագոնի խոսնակ Ջոն Քիրբին հրաժարվել է մեկնաբանել Իրաքի հյուսիսում Թուրքիայի զինված ուժերի գործողությունների մասին PKK-ի սիրիական թևի՝  YPG-ի ղեկավարների հայտարարությունը:

Anadolu-ի թղթակցի՝ Անկարայի դեմ «YPG-ի ահաբեկչական գործողությունների» վերաբերյալ հարցի ժամանակ Քիրբին ուշադրություն է հրավիրել մեկ այլ ահաբեկչական կազմակերպության՝ ԻՊ–ի դեմ պայքարին: Պաշտպանության նախարարության ներկայացուցիչը նշել է, որ Իրաքում և Սիրիայում ԱՄՆ գործողություններն ուղղված են միայն ԻՊ-ի ահաբեկիչների դեմ, և այս հարցում ամենաարդյունավետ գործիքը «տեղական ուժերի հետ փոխգործակցությունն է»:

Հիշեցնենք, որ ԱՄՆ–ը Սիրիայում համագործակցում է YPG–ի հետ. թեև PKK–ն ԱՄՆ–ում համարվում է ահաբեկչական կառույց, այնուամենայնիվ, նրա սիրիական թևը չի ընդգրկված այդ ցուցակում։

Թուրք լրագրողի հարցին, թե ահաբեկչության դեմ պայքարն օրինականացնո՞ւմ է Սիրիայում ժողովրդավարական ուժերի՝ YPG-ի առաջնորդների հայտարարությունները, Քիրբին ասել է. «Մենք շարունակում ենք աշխատել Սիրիայի ժողովրդավարական ուժերի հետ: Այս հարցում փոփոխություններ չկան»: