Հայաստանում գիտաշխատողների 48.3 տոկոսը 65 տարեկանից բարձր են. Գիտության պետական ​​կոմիտե

Հայաստանի կրթության, գիտության, մշակույթի եւ սպորտի նախարարությունը երկրի կրթական համակարգի ամրապնդման լուրջ անհրաժեշտություն է տեսնում: Այս մասին փետրվարի 1-ին «Գիտությունը` որպես անվտանգության եւ զարգացման հենասյուն» թեմայով խորհրդարանական լսումների ժամանակ ասաց ՀՀ կրթության, գիտության, մշակույթի եւ սպորտի նախարար Վահրամ Դումանյանը:

Նրա խոսքով` անհրաժեշտ է լայնորեն օգտագործել կրթական համակարգը` հանրակրթությունը եւ բարձրագույն կրթությունը: «Բարձրագույն կրթությունը չի կարող որակյալ լինել առանց հանրակրթության համապատասխան համակարգի առկայության, առանց բարձրագույն կրթության չի կարող լինել գիտություն, առանց գիտության, կրթված մարդկանց, բարձրագույն կրթության չի կարող զարգացած տնտեսություն լինել»,- արձանագրեց Դումանյանը:
Միեւնույն ժամանակ, նախարարը խոստովանեց, որ այսօր երկրում կրթության բարձր մակարդակով կադրերի վերարտադրության եւ մոտիվացիայի լուրջ խնդիր կա: 

Իր հերթին, Հայաստանի գիտության պետական կոմիտեի նախագահ Սարգիս Հայոցյանը նշված խնդիրների լուծման համար շեշտեց երիտասարդության ներգրավման կարեւորությունը գիտական առաջատար պաշտոններում: «Բարեփոխումներ իրականացնելու համար մենք պետք է խոստովանենք, որ համակարգում մի շարք խնդիրներ կան, եւ մենք պետք է աշխատենք դրանց լուծման ուղղությամբ: Դրանցից ամենակարեւորը մեր գիտնականների ծերացող համայնքն է»,- պարզաբանեց Հայոցյանը: Նա, մասնավորապես, ուշադրություն հրավիրեց այն փաստի վրա, որ Հայաստանում գիտնականների 48.3 տոկոսը 65 տարեկանից բարձր են: