ԱՄՆ Հայ դատի հանձնախումբը ողջունում է կոնգրեսական Նունիեզի՝ ԱՄՆ-ի կողմից Թուրքիային զենքի վաճառքը դադարեցնելու կոչը

Ներկայացուցիչների պալատի Հետախուզական հարցերով հատուկ հանձնախմբի բարձրաստիճան անդամ Դևին Նունիեզը կոչ է արել Սպիտակ տանը, որ անմիջապես կասեցվի բոլոր զենքերի վաճառքը Թուրքիային ու դադարեցվի ռազմական աջակցությունն Ադրբեջանին: Այս մասին Yerkir.am-ին տեղեկացնում են ԱՄՆ Հայ դատի հանձնախմբից:

ԱՄՆ Հայ դատի հանձնախմբի տնօրեն Րաֆֆի Համբարյանը ողջունել է կոնգրեսականի այս կոչը՝ անընդունելի համարելով նաև Հայ դատի պահանջների նկատմամբ Միացյալ Նահանգների արտաքին գործերի նախարարության ցուցաբերած լռությունը:

Հիշեցնենք՝ Համբարյանը մի քանի շաբաթ առաջ Ֆրեզնոյում հանդիպել էր կոնգրեսականի հետ, որի ընթացքում շեշտել էր, որ Ամերիկան պետք է կասեցնի անօդաչու թռչող սարքերի համար նախատեսված ամերիկյան պահեստամասերի վաճառքը Թուրքիային՝ նկատի ունենալով, որ դրանք Թուրքիայի ու վերջինիս դաշնակից Ադրբեջանի կողմից Արցախում օգտագործվում են քաղաքացիական օբյեկտների դեմ:

Նունիեզն անընդունելի է համարել Ադրբեջանի կողմից անօդաչուներով հարձակումները՝ պահանջելով, որ դրանք անմիջապես դադարեցվեն: Միևնույն ժամանակ նա ընդունել է, որ այդ հարձակումները խրախուսվում են Թուրքիայի կողմից:

ԱՄՆ Հայ դատի հանձնախմբի շնորհիվ մինչ այժմ արդեն իսկ մի շարք ընկերություններ կասեցրել են անօդաչու թռչող սարքերի համար նախատեսված պահեստամասերի վաճառքը, իսկ մնացածը դեռևս քննարկում են նման քայլեր ձեռնարկելու անհրաժեշտությունը:

Թարգմանությունը՝ Yerkir.am-ի