Լոս Անջելեսն Արցախի կողքին է. ամերիկացի գործիչներն Արցախի դրոշով պաշտպանիչ դիմակներ են կրել

Լոս Անջելեսի քաղաքային իշխանության անդամներն Արցախի դրոշով պաշտպանիչ դիմակներ են կրել` հաջակցություն Արցախի` Ադրբեջանի սանձազերծած լայնածավալ պատերազմում: Այս մասին ֆեյսբուքյան իր էջում լուսանկար և գրառում է հրապարակել կոնգրեսական Ադամ Շիֆը:

«Լոս Անջելեսը Հայաստանի և Արցախի ժողովրդի կողքին է»,- գրել է կոնգրեսականը:

Հոկտեմբերի 5-ին Լոս Անջելեսի քաղաքապետ Էրիկ Գարսետին «Թվիթեր»-ի իր էջում գրել է. «Լոս Անջելեսը հպարտ է՝ հայկական ամենամեծ սփյուռքի տունը լինելու համար: Մենք կանգնած ենք Հայաստանի ժողովրդի կողքին: Ես կոչ եմ անում Վաշինգտոնի մեր ղեկավարներին՝ իրականացնել կայուն և խիստ դիվանագիտություն, որն անհրաժեշտ է Արցախում խաղաղություն հաստատելու համար»: Նա նաև շեշտել է, որ Թուրքիան պետք է դուրս գա գործողություններից:

Արցախի հետ շփման գծի ողջ երկայնքով սեպտեմբերի 27-ի վաղ առավոտյան Ադրբեջանն ակտիվ ռազմական գործողություններ է սկսել: Հրետակոծվում և հրթիռակոծվում են նաև խաղաղ բնակավայրերը, այդ թվում՝ մայրաքաղաք Ստեփանակերտը և Շուշին: Ադրբեջանի ԶՈՒ-ն թիրախավորել է նաև ՀՀ զինվորական և քաղաքացիական ենթակառուցվածքները: Արցախում և Հայաստանում Ադրբեջանի սանձազերծած ագրեսիայի, ողջ զինանոցի կիրառման՝ հրետակոծման, ԱԹՍ հարվածների և հրթիռակոծման հետևանքով 21 քաղաքացիական անձ է զոհվել, վիրավորվել 80-ը: Արցախի նկատմամբ Ադրբեջանի սանձազերծած պատերազմում զոհվել է 240 զինծառայող և կամավորական: