Վաշինգտոնը դատապարտել է Էրդողանի հանդիպումը ՀԱՄԱՍ-ի առաջնորդների հետ

ԱՄՆ-ն խստորեն դատապարտում է Թուրքիայի նախագահ Էրդողանի որոշումը`ՀԱՄԱՍ-ի երկու առաջնորդներին օգոստոսի 22-ին Ստամբուլում հյուրընկալելու վերաբերյալ. հայտարարել է պետդեպարտամենտի խոսնակ Մորգան Օրթագուսը:

«ԱՄՆ-ն և Եվրամիությունը ՀԱՄԱՍ-ը համարում են ահաբեկչական կազմակերպություն, և նախագահ Էրդողանի կողմից ընդունված երկու պաշտոնյաներն էլ համաշխարհային ահաբեկիչների ցուցակում են», - հիշեցրել է Օրթագուսը՝ նշելով, որ այդ պաշտոնյաներից մեկը հետախուզվում է «Պարգև հանուն արդարադատության» ծրագրի շրջանակներում՝ կապված իր մասնակցությամբ մի քանի ահաբեկչական գործողությունների, գողությունների և առևանգումների հետ:

«Նախագահ Էրդողանի այս ահաբեկչական կազմակերպության հետ մշտական շփումները օգնում են Թուրքիային մեկուսացվել միջազգային հանրությունից, վնասել Պաղեստինի ժողովրդի շահերը և խաթարել Գազայից ահաբեկչությունները կանխելու գլոբալ ջանքերը», - ասել է Օրթագուսը. «Մենք շարունակում ենք մտահոգություն հայտնել ՀԱՄԱՍ-ի հետ Թուրքիայի կառավարության հարաբերությունների ամենաբարձր մակարդակի առնչությամբ»:

Էրդողանն այս տարի արդեն երկրորդ անգամ է հյուրընկալում  Համասի ղեկավարությանը Թուրքիայում. առաջին հանդիպումը տեղի է ունեցել փետրվարի 1-ին: