Ալիևն ընդգծել է ռազմական բյուջեի ավելացման անհրաժեշտությունը

Նախագահ Իլհամ Ալիևը անհրաժեշտ է համարում վերանայել և ավելացնել Ադրբեջանի ռազմական բյուջեն:

«Հաշվի առնելով տարածաշրջանում տեղի ունեցող վերջին իրադարձությունները, մենք պետք է վերանայենք մեր ռազմական ծախսերը: Հնարավոր է, որ Հայաստանը, հաշվի առնելով վերջին դեպքերից հետո իր խղճուկ վիճակը, կրկին ևս մեկ սադրանք ձեռնարկի», - նախարարների կաբինետի նիստում հայտարարել էր Ալիևը՝ փորձելով դարձյալ մոլորեցնել սեփական ժողովրդին՝ սահմանում ադրբեջանական «հաղթանակի» առասպելներով։

«Ադրբեջանական բանակը լիովին վերահսկում է օպերատիվ իրավիճակը և կշարունակի վերահսկել այն: Բայց մենք պետք է պատրաստ լինենք ամեն ինչի: Հետևաբար, մենք պետք է վերանայենք ռազմական ծախսերը, մասնավորապես, հաջորդ տարվա բյուջեում», - նշել է Իլհամ Ալիևը:

Նշենք, որ այս գիշեր ադրբեջանական կողմը Տավուշի ուղղությամբ հերթական անհաջող դիվերսիոն փորձն է կատարել և ստանալով համարժեք պատասխան հետ է շպրտվել, որից հետո սկսել է հրետակոծել հայկական բնակավայրերը։ Հայկական կողմը կորուստներ չունի, իսկ ադրբեջանականը, բացի տեխնիկայից, ունի նաև մի քանի մարդկային կորուստ։