Խենթություն և հսկայական սխալ. Բայդենի խորհրդականի և իսրայելցի գեներալի կարծիքը Արևմտյան ափի անեքսիայի մասին

Դեմոկրատական կուսակցությունից ԱՄՆ նախագահի թեկնածու Ջո Բայդենի խորհրդական Նիկոլաս Բյորնսը հայտարարել է, որ Հորդանանի Արևմտյան ափի վրա ինքնիշխանության կիրառումը Իսրայելի «հսկայական սխալը» կլինի: Այդ մասին, ըստ yerkir.am-ի, նա ասել է ամերիկյան The Arena ամսագրին:

Բյորնսի խոսքով` ինքնիշխանության կիրառումը կարող է բացասաբար ազդել ԱՄՆ-ի և իսրայելական կառավարության հարաբերությունների  վրա:

«ԱՄՆ-ի երկու կուսակցություններն աջակցում են Իսրայելին, ինչպեսև` նախագահի պաշտոնի երկու թեկնածուները: Միացյալ Նահանգները աջակցում է Իսրայելին և ձգտում նրա անվտանգությանը: Այնուհանդերձ, ես կարծում եմ, որ եթե Իսրայելը անեքսիայի ենթարկի Արևմտյան ափը, դա կարող է լրջորեն վնասել երկու երկրների հարաբերություններին: Ինչպես դեմոկրատների, այնպես էլ հանրապետականների շրջանում համոզվածություն կա, որ անեքսիան ոչ միայն խելամիտ քայլ չէ, այլև` հսկայական սխալ»,- նշել է Բայդեն խորհրդականը:

Ըստ նրա` նման քայլով Իսրայելը լրջորեն կվնասի իրեն միջազգային ասպարեզում, նաև` կողմնակիցների շրջանում:

«Դա, ըստ էության, կտապալի երկիու պետությունների մասին ապագա որոշումը, որը 1967 թվականից ԱՄՆ-ի պաշտոնական դիրքորոշումն է արաբա-իսրայելական հակամարտության վերաբերյալ»,- ընդգծել է Բյորնսը:

MIGnews.com-ի հաղորդմամբ, իր հերթին, իսրայելական բանակի նախկին հրամանատար, գեներալ-մայոր Ավի Միզրահին է հեռուստատեսային հարցազրույցում  հայտնել, որ հրաժարվել է զբաղեցնել «անեքսիայի շտաբի» պետի պաշտոնը:

Նա հայտարարել է. «Անեքսիան խենթություն է: Քանի դեռ շտաբների օպերատիվ աշխատանք չի իրականացվել, նախընտրելի է, որ ընդհանրապես ոչինչ չնախաձեռնեն: Ռազմա-քաղաքական կաբինետը և կառավարությունը չեն ստուգել, թե ինչ հետևանքներ կունենա այդ քայլը, հետևաբար` հարկավոր է սպասել»:

Իսրայելցի գեներալը տեղեկացրել է, որ պաշտպանության նախարար Բենի Գանցի առաջարկից հրաժարվել է շահերի հնարավոր կոնֆլիկտի պատճառով. պաշտոնաթող գեներալը ներկայումս գլխավորում է անվտանգության ոլորտի ընկերություն: Սակայն Միզրահին ընդգծել է, որ  եթե ընկերության ղեկավար էլ չլիներ, միևնույն է, կհրաժարվեր այդ պաշտոնից: