Թաիլանդը հնարավոր է՝ անցնի սահմանափակումների թուլացման երկրորդ փուլին. ՌԻԱ «Նովոստի»

Թաիլանդը մայիսի 17-ին հնարավոր է անցնի կորոնավիրուսի հետևանքով երկրում մտցված սահմանափակումների թուլացման երկրորդ փուլին. այս մասին ՌԻԱ «Նովոստի»-ի տեղեկացմամբ՝ ասել է Կորոնավիրուսի դեմ պայքարի կենտրոնը. հայտնում է Yerkir.am-ը։

Հիշեցնենք՝ սահմանափակումների թուլացման առաջին փուլը սկսվել էր մայիսի 3-ին: Աշխատանքը վերսկսել են ոչ մեծ խանութները, ռեստորանները, վարսավիրանոցները, մարդկանց թույլատրվել է այցելել հանրային այգիներ: Սահմանափակումների թուլացման երկրորդ փուլում նախատեսվում է, անվտանգության կանոնները պահելու պայմանով, անդրադառնալ խոշոր օբյեկտներին՝ այդ թվում մեծ առևտրի կենտրոններին:

Ծրագիրը հետևյալն է՝ մայիսի 8-12-ը կհավաքվեն կորոնավիրուսի հետ կապված վերջին երկու շաբաթվա տվյալները, իսկ մայիսի 13-ին նախատեսված խորհրդակցությանը կհստակեցվեն հետագա անելիքները: Եթե իրավիճակը շարունակի բարելավվել, ապա կառավարությունը կգնա սահմանափակումների թուլացման հաջորդ փուլի:

Հավելվում է՝ Թաիլանդում վերջին օրերին կորոնավիրուսով վարակվածության 1-2 նոր դեպք է գրանցվում: Վարակվածների ընդհանուր թիվը շուրջ 3 հազար է, որից մահացել է 55 մարդ: Ամբողջությամբ ապաքինվել է 2 772 մարդ: