Ո՞վ է ձեզ իրավունք տվել հրաժարվել պահանջատիրությունից. Ի. Սաղաթելյանի արձագանքը՝ ՀՑԹԻ-ի կոչին

ՀՅԴ Հայաստանի Գերագույն մարմնի ներկայացուցիչ Իշխան Սաղաթելյանը ֆեյսբուքյան գրառմամբ դատապարտել է Հայոց ցեղասպանության 105-րդ տարելիցին ընդառաջ Հայոց ցեղասպանության թանգարան-ինստիտուտի նախաձեռնությունը։ Ստորև ներկայացնում ենք ԳՄ ներկայացուցչի անդրադարձը.   

«Պարոնայք,

Ո՞վ է ձեզ իրավունք տվել հրաժարվել պահանջատիրությունից, ո՞վ է ձեզ իրավունք տվել անտեսել մեր համազգային պահանջատիրությունը, ո՞վ է սրա պատասխանատուն։ Սա հերթական դիլետանտի՞զմն է, թե՞ 1990-ական թվականներից ժառանգված «խաղաղասիրական» քաղաքականության մասը։

Լրջացեք, կարմիր գծեր եք հատում ....»:

Հիշեցնենք՝ Հայոց ցեղասպանության 105-րդ տարելիցին ընդառաջ Հայոց ցեղասպանության թանգարան-ինստիտուտը կոչով դիմել է Հայաստանի քաղաքացիներին, հայ ժողովրդին ու նրա բա­րեկամներին՝ հորդորելով ապրիլի 24-ին «ֆեյսբուք»-ում իրենց լուսանկարները փոխարինել հատուկ այդ նպատակով ստեղծված հու­շային շրջանակի մեջ առնված իրենց հարազատների՝ զոհ կամ վերապրող՝ լուսանկարներով, դրա բացակայության պարագայում՝ անուն-ազգանունով, նաև մի փոքր պատմությամբ նրա կամ նրանց մասին։

«Եթե չկան զոհ կամ վե­րապրող հարազատներ, ապա տեղադրեք Ցեղասպանության զոհ արևմտա­հայ մտավորականների, հասարակական-քաղաքական գործիչների, ֆիդա­յիների, շարքային զինվորների ու զորավարների լուսանկարները։ Դրեք արևմտահայության մշակութային ժառանգության գանձերի լուսանկարնե­րը, կիսվեք Արևմտյան Հայաստանի ձեզ հասանելի պատկերներով։ Եվ ըն­դամենը մեկ պարզ գրությամբ՝ ԵՍ ՀԻՇՈՒՄ ԵՄ կամ ԿԸ ՅԻՇԵՄ», - ասված է կոչ-հաղորդագրության մեջ:

Հայոց ցեղասպանության թանգարան-ինստիտուտի այս քայլը, այն է՝ Հայոց ցեղասպանության 100-ամյա տարելիցին ընդունված «Հիշում եմ և պահանջում» կարգախոսի աղավաղումը, այդ կարգախոսից «պահանջում»-ի կրճատումը բուռն քննադատության արժանացավ հանրության շրջանում՝ որակվելով որպես հետքայլ և պահանջատիրությունից հրաժարում։