«Ղրիմը վերադարձնելու համար» մեդալի պատճառով ազգությամբ հայ ՌԴ քաղաքացու մուտքն Ուկրաինա արգելել են

Ռուսաստանի ազգությամբ հայ քաղաքացի Կարեն Հարությունյանին Կիևի օդանավակայանում արգելել են մուտք գործել Ուկրաինա. հայտնում է Yerkir.am-ը՝ RusArminfo-ին հղումով:

Նշվում է՝ նա Մինսկից Կիև էր ժամանել անձնական հարցերով։ 

Պարզվել է՝ Հարությունյանն ունի «Ղրիմը վերադարձնելու համար» մեդալ, նաև անդամակցում է Ռուսաստանում իշխող «Եդինայա Ռոսսիա» կուսակցությանը, միաժամանակ շնորհակալագրեր ունի ՌԴ նախագահից և Պետդումայից։ Այս ամենը հաշվի առնելով՝ ուկրաինացի սահմանապահները որոշել են 3 տարով արգելել նրա մուտքը Ուկրաինա։

Կարեն Հարությունյանը ծնվել է 1965 թվականին, Երևանում։ ՀՀ մայրաքաղաքում ավարտել է Պոլիտեխնիկը, ապա տեղափոխվել  Ռուսաստան։ 1997 թվականից Մոսկվայի մոտ գտնվող Նոգինսկում Հարությունյանը ղեկավարում է «Литейно-механический завод» ձեռնարկությունը։