կարևոր
0 դիտում, 4 տարի առաջ - 2020-03-11 14:49
Քաղաքական

Վարչապետը ներողություն է խնդրել կուրթանեցի երիտասարդից

Ես ուզում եմ վերլուծել իմ գործողությունները՝ արդյո՞ք ես այդ խոսակցության մեջ ինչ-որ բան մեր սիրելի քաղաքացուն՝ Մեխակ Առաքելյանին, սխալ եմ ասել: Ես ուզում եմ խոստովանել երկու սխալ, որ թույլ եմ տվել. այսօր այս մասին «Այո»-ի քարոզարշավի ժամանակ հայտարարեց ՀՀ վարչապետ Նիկոլ Փաշինանը՝ անդրադառնալով նախօրեին Լոռու մարզի Կուրթան գյուղում բնակչի հետ ունեցած միջադեպին. հայտնում է Yerkir.am-ը:

Նա, մասնավորապես, նշել է.  «Ես գերագնահատել եմ մարդու առողջական վիճակը գնահատելու իմ ընդունակությունը և թերագնահատել եմ այն հանգամանքը, որ քաղաքացին, քանի որ խոսում է վարչապետի հետ, կարող էր կաշկանդվել: Ես այդ երկու սխալի համար ուզում եմ Մեխակ Առաքելյանից էլ, ՀՀ բոլոր քաղաքացիներից էլ ներողություն խնդրել»,-ասաց նա՝ ընգծելով, թե ինքն էլ Մեխակի նման մի տղա է՝ ծնված Իջևանի մի սովորական ընտանիքում, որին անընդհատ փորձել են ասել՝ մեջք պետք է ունենաս, պետք է «վիզդ ծռես» ու հավելել. «Մենք մարդ ենք, սխալական ենք, կարող ենք սխալվել, բայց մենք նենգ և անազնիվ բան քաղաքացու նկատմամբ չենք անի, մանավանդ, որ ես համոզված եմ, որ մեր խոսակցության արդյունքում նրա ընտանիքը հայտնվել է համընդհանուր ուշադրության կենտրոնում, և ես հույս ունեմ, որ այն աջակցությունը, որ նա կստանա, կլինի զարգացման աջակցություն»:

Yerkir.am-ն ավելի վաղ տեղեկացրել էր՝ Կուրթան գյուղում բնակվող 34-ամյա Մեխակ Առաքելյանը շաբաթ օրը Ստեփանավան այցի ժամանակ դիմել էր վարչապետ Նիկոլ Փաշինյանին՝ խնդրելով լուծել իր ընտանիքի տան խնդիրը, ինչին ի պատասխան Նիկոլ Փաշինյանը շատ կոշտ ու վիրավորական էր արձագանքել:

Վարչապետը հանդիմանել էր տղամարդուն՝ ասելով, թե նա լինելով «առողջ տղամարդ», աշխատելու և տուն ստեղծելու փոխարեն իրեն է դիմում՝ առանց տեղեկանալու, թե իրականում այդ երիտասարդ տղամարդն ինչ առողջական խնդիրներ ունի և ինչպես է իրականում հայթայթում օրվա հացը:

Սակայն, արդեն քանի օր է՝ համացանցում դատապարտում են Նիկոլ Փաշինյանի պահվածքը, նույնիսկ խմբեր են ձևավորվել, երիտասարդ Մեխակ Առաքելյանին օգնություն տրամադրելու համար հաշվեհամարներ են բացվել:

Որոշ ժամանակ անց NEWS.am-ի հետ զրույցում կուրթանեցին նշել էր, որ ինքն այնքան էլ առողջ չէ. «Հիվանդ տղա եմ ես։ Ողնաշարիս երկու գրիժա կա, դիսկերս մաշված են, մի քանի անգամ «Շտապօգնություն» ենք կանչել, եկել ցավազրկել, գնացել են։ Բրոնխիտ ունեմ, որ տվել ա թոքերիս։ Բանակում չեմ ծառայել անգամ, ուղարկել էին բուժզննման Երեւանում, ասեցին՝ պիտանի չես ծառայության։ Բացի ողնաշարս, նաեւ երիկամների խնդիր ունեի։ Դա ծանր աշխատանքից էր, 11 տարեկանից աշխատել եմ՝ տուկ եմ բարձել օրը 3000-ով, 4000-ով, դաշտային գործեր եմ արել։ Հետո ռեմոնտի գործ էի անում, մի քանի տարի Ռուսաստան գնացի, բայց ամեն անգամ խաբվում էի։ Մի կերպ աշխատել եմ, որ մի հատ կով եմ ստեղծել՝ երեխեքին կաթ լինի։ Երնեկ ես առողջություն ունենայի, դուրս գայի, մի տեղ աշխատեի, տուն ստեղծեի։ Իմ դուրն էլ չէր գա, որ ես գնայի, պարոն Փաշինյանին ասեի՝ էս բանն ա պետք։ Բայց ես հիմա չեմ կարողանում մի վեդրո էլ վեր քաշեմ, տանը թեթեւ գործեր որ լինում ա, անում եմ»,- ասել էր նա ու նշել. «Ես գնացել էի վարչապետին խնդրեի, որ գոնե քարից երկու սենյականոց տնով օգնեն, որ խոնավ չլինի, երեխեքը չհիվանդանան։ Ուղղակի ես չկարողացա խոսեմ, ամաչեցի, որ առաջին անգամ հանդիպեցի իրեն, պապանձվեցի, խոսքերս դուրս չեկան, որ ասեի, ինքն ինձ հաղթեց էլի, ինքն ինձ ինչ պետք էր, ասեց... Ես էլ, որ բան չխոսացի, ինքը սկսեց ինձ՝ որ առողջ տղա ես, խի չես աշխատում, էլ չկարողացա խոսեմ։ Էսօր իմ վերաբերյալ շատ վատ բաներ են գրում, մեկը գրել ա՝ բոմժ ես, մեկը գրել ա՝ եսիմինչ ես, ասել եմ՝ ոչինչ, վերեւը Աստված կա, թող ասեն»։

Առավել մանրամասն՝ տեսանյութում.